Atualità
Dala Junta provinziala: les dezijiuns plü importantes
De plü é stades les dezijiuns dla Junta de ai 11 de aurí: fonds FESR, investimënc tl’agricoltöra, plann dla performance y tröp d’ater.
Löm vërda dala Junta provinziala, tratan süa sentada da incö ai 11 de aurí, al secundo avis dl program Interreg V-A Talia-Austria che mët a desposiziun fonds por indöt 21 miliuns de euro. Le program Interreg á sciöche obietif chël da renforzé la cooperaziun transfrontaliera tla zona de confin danter i dui Paisc: por la perioda che vá dal 2014 y 2020 vëgnel metü a desposiziun indöt 98 miliuns de euro, la maiú pert de chisc (82 miliuns) vëgn garantis dal Fonds europeich por le svilup regional (FESR), implü röiel lapró contribuc statai dala Talia y dal’Austria.
Por le 2017 vëgnel sostigní dui pilastri che reverda da öna na pert la natöra y la cultura y dal’atra pert les competënzes istituzionales. Por ci che reverda le pröm pilaster é l’obietif chël da sostigní i proiec che favorësc la conservaziun, la promoziun y le svilup dl patrimone natural y cultural dl teritore. A desposiziun él chiló indöt 10 miliuns de euro. La secunda pert di proiec reverda indere proiec de cooperaziun danter les aministraziuns publiches sön tematiches sciöche la mobilité, la sanité, la prevenziun di prighi y dla formaziun. I proiec ametüs al finanziamënt dl program Interreg V-A Talia-Austria podará ciafé n contribut cina 85 porcënt di cosć ametüs. Les domandes podará gní presentades dai 12 de aurí ai 30 de jügn tres la plataforma online „coheMON“, por plü informaziuns: www.interreg.net.
N’atra dezijiun dla Junta provinziala, sön proposta dl assessur Arnold Schuler, é stada l’aprovaziun di criters nüs por le sostëgn ai investimënc dles impreses agricoles. „Al se trata dla revijiun y dl’integraziun dl provedimënt bele aprové dan da n ann – sotlignëia Schuler – da öna na pert cun n aumënt di contribuc y dal’atra pert cun l’adatamënt dla contabilité ales desposiziuns atuales söl’armonisaziun di bilanc.“ Danter les novités él ince la poscibilité da avëi l’azes a n sostëgn ajuntif dl 5 porcënt por la produziun bio tles zones cun limic naturai y insciö definides sciöche „svantajades“. Implü él ince gnü confere le bonus dl 5 porcënt por i jogn che laora tl'agricoltöra.
La maioraziun sará indere dl 2 porcënt por les ativités agricoles che vëgn efetuades sura i 1000 metri dal livel dl mer, y tl caje de investimënc che reverda la cumpra de mascinns y de laurs de arcunciada di danns dal bur tëmp. Les somes minimes por chëres che al pó gní fat domanda é de 2.500 euro. Por ci che reverda le setur dla ordöra y dla produziun dl vin sará la dorada di imprësc cun n tas alisiré de 10 agn (y nia ma plü de 5 agn), y al é ince gnü inserí la poscibilité da ciafé contribuc por la cumpra de grus, de de pici camions y de atrezadöres por la racoiüda dl fëgn. Por che i criters nüs pois gní aplicá él ciamó da aspeté l’aprovaziun da pert dl’Uniun europeica.
Implü á la Junta provinziala ince ajorné incö les diretives sön la cualité y l’adoranza de materiai da frabiché reziclá, dantadöt por ci che reverda les escavaziuns y les demoliziuns. Chësta dezijiun ê nezesciara deache le regolamënt varënt dla Provinzia ê gnü scrit tl 1999 y ti ultims dezenns s’él mudé tröp tl setur dl’adoranza di materai da frabiché reziclá. Da avëi insciö aprové bele d’otober le regolamënt nü por la recuperada di materiai da costruziun á la Junta provinziala ajorné ai 11 d’aurí sön proposta dl assessur Christian Tommasini les diretives ajornades sön la cualité y l’adoranza di materiai da reziclé.
Ajorné é ince gnü dala Junta le regolamënt unitar por ci che reverda l’ativité de recuperada, cun l’incassamënt d’oblianza, dles entrades dla Provinzia. Le regolamënt unitar definësc avisa les ativités y la gestiun dl incassamënt dles entrades dla Provinzia tl caje che les prozedöres da denant ne ais albü degöna contlujiun positiva. La normativa nöia é gnüda elaborada da n grup de laur cun rapresentanc dla Provinzia, dl Consorz di Comuns y dla sozieté responsabla tl setur y vëgn aplicada por ci che reverda les cutes, les sanziuns aministratives, les entrades patrimoniales por l’adoranza de bëgns y de sorvisc manajá dala Provinzia mo ince dai ënc y dales aziënda provinziales y dales sozietés coordinades o manajades dala Provinzia. „Le test nü é n stromënt por garantí i obietifs de valivanza fiscala y dess assiguré a düc i zitadins n’uniformité tl sorvisc dl incassamënt d’oblianza“, spliga le presidënt Arno Kompatscher. Le regolamënt nü prevëiga ince la posciblité da paié te rates sön domanda aposta da pert di domandatars.
Por ci che reverda l’aministraziun provinziala á la Junta provinziala ince aprové le plann dla performance 2017-2019 che é le documënt che definësc les priorités politiches, i obietifs strategics y i traverc anuai dl’aministraziun provinziala. „Le plann nes pormët da fissé te na manira trasparënta i traverc y les ressurses finanziares a desposiziun“ sotlignëia l’assessuria Waltraud Deeg. Le plann dla performance reverda sura 1.000 prozedöres aministratives cun informaziun ütles por zitadins, impreses, families y assoziaziuns. Por plü informaziuns: http://www.provincia.bz.it/it/amministrazione-trasparente/performance.asp
USP
