Atualità
Dala Junta: plann mobilité, löm vërda ala pröma verjiun
Raiuns por i loc de gara, linies despartides sön categories, criters de cualité. La Junta Provinziala á aprové la pröma verjiun dl plann dla mobilité.
Sostenibilité, atenziun ales esigënzes di utënc, standarg alc de cualité dl sorvisc: chisc é i pilastri dl plann provinzial dla mobilité nü, de chël che na pröma proposta é gnüda aprovada ai 9 de ma dala Junta provinziala. „Le plann – á splighé le presidënt Arno Kompatscher – definësc i raiuns de referimënt y ince d’atri criters, mo al ne contëgn degöna dezijiun sön la forma dles gares por les conzesciuns, por chëres che le plann é na sort de basa strategica. L’obietif prioritar resta chël da lauré fora conzesciuns che ne tol nia ma en conscidraziun l’oferta economicamënter plü vantajosa, mo che ciares ince ai standarg de cualité por ti jí adincuntra ales esigënzes di zitadins.“ L’assessur Florian Mussner á prezisé che „le plann é le resultat de n’analisa ampla y detaiada, che á ince tigní cunt de düc i aspec coliá ales domandes di utënc, al inclujiun soziala, ala sostenibilité ambientala y ala metüda en rëi de döt le teritore. Ala basa de döt – é jü inant l’assessur Mussner – él la cosciënza che la mobilité publica á n’importanza strategica por i zitadins, les impreses y le turism. Ma insciö podará le trasport publich rapresenté ince tl dagní n’alternativa reala y concreta al mesi privac y mioré insciö de conseguënza la cualité de vita di abitanc dl Südtirol.“
De plü chilometri por i bus ti raiuns rurai
La situaziun de partënza, sciöche al vëgn confermé dai dac, é bele buna: le 93 procënt dla popolaziun südtiroleja vëgn socodida y coliada diretamënter dala rëi locala, mo l’obietif é chël de amplí ciamó de plü chësc dat. Sön la fondamënta dl trasport sön scines él le travert dl plann chël da avëi n aumënt dl 10 porcënt di chilometri fac, che messan insciö passé da 30 miliuns a plü co 32,6 miliuns de chilometri al ann, cun na chersciüda dantadöt dles linies aldinfora dles cités.
Sorvisc partis sö sön categories
Por arjunje l’obietif dl ampliamënt dles linies extraurbanes él gnü fat na spartiziun dles linies sön de plü categories: les linies prinzipales, les linies de basa, les linies turistiches y le trasport scolastich. „Chësta spartiziun é basada sön criters sciöche la periodizité, frecuënza y l’adoranza dles linies, mo ince le coliamënt te raiuns plü debli o che á n mënder svilup turistich – spliga le diretur dla Repartiziun Mobilité Günther Burger – sön la basa de chisc criters gnará spo definí la competënza dles linies, sce la Provinzia o le Comun, ince por ci che reverda la organisaziun y le finanziamënt.“ Les linies prinzipales y le trasport publich romagn de competënza dla Provinzia, por les atres linies de interes ma comunal él poscibl da fá n acordanza dala Provinzia y i Comuns. Atualmënter él indöt 12 linies che vëgn cofinanziades da Provinzia y Comuns (70%-30% la spartiziun), cun n aumënt preodü cina a 29 linies. „Un di obietifs é chël da reorganisé y potenzoé le sorvisc ince por renforzé les zones manco svilupades dla Provinzia“, insciö Mussner.
Cinch raiuns por les gares
N ater passaje fondamental dl plann dla mobilité y chël da despartí le teritore te raiuns, por vignun sarál spo preodü na gara cun assegnaziun dles conzesciuns. I raiuns é gnüs definis sön la basa de criters sozio-economics, dala domanda de mobilité y de interconesciun cun les diretives de coliamënt prinzipales. Indöt él gnü definí cinch raiuns: le pröm é chël cun i dui zëntri Balsan y Maran, olache al é preodü l’assegnaziun inhouse SASA, implü él preodü cater raiuns: Val de Puster, Val d’Isarch, Val Venuesta y Sarenthein adöm cun le raiun a sud de Balsan. Do la publicaziun dl plann provinzial ará comuns y dötes les porsones interessades 90 dis de tëmp por fá propostes y por dé jö arac, che la Junta valutará ciamó n iade por l’aprovaziun definitiva.
Intervista assessur Mussner por Ladin
USP
