Atualità
Dala Jonta: apurvei i programs 2017 di 7 parcs naturei
Plu che 2,1 milions de euro ie a despusizion per i programs 2017 di 7 parcs naturei dl Südtirol: la Jonta provinziela à apurvà ncuei l finanziamënt.
L mpëni finanzier apurvà ncuei dala Jonta ie partì su danter i parcs Scilier-Ciadenat (223 mile euro), Grupa de Texel (432 mile euro), Puez-Odles (389 mile euro), Fanes-Senes-Braies (335 mile euro), Trudner Horn (155 mile euro), Trëi Pizes de Lavarëi (264 mile euro) y Rieserferner-Ahrn (326 mile euro). "Son cuntënc de udëi che i parcs naturei cunfermea cun proiec cuncrec si cuntribut ala cunservazion dla cuntreda naturela y a sensibilisé la populazion", sotrissea l assessëur provinziel per l ambient Richard Theiner. I programs ie unic purtei dant dai cumiteies de gestion spezifics, te chëi che la aministrazions locales,l setor agriculy chël furestel y l’associazions ambientalistes ie reprejentedes. "A chësta maniera – tlarësc l diretëur dl Ufize provinziel parcs naturei Enrico Brutti – partezipea al pruzes de dezijion duta la grupes de nteres y tl medemo mumënt iel garantì la majera trasparënza puscibla."
Per la Dolomites patrimone mundiel UNESCO iel unì metù a despusizion ntëur n 165 mile euro, ntan che per la mesures de cunservazion di raions Natura 2000, che ie sot a defendura particulera, iel preudù n capitul de 652 mile euro, finanzià cun scioldi dla UE. Mo d’autri nvestimënc ie preudui per ntervënc de mantenimënt urdener y straurdener, per i zëntri de vijita di parcs naturei, per i assistënc, per la jites, la nfurmazion y nrescides spezifiches. I pesć de sutëni per la cura y l mantenimënt dla cuntreda, paiei ora per la cunservazion dla cuntreda y la biodiversità, monta chëst ann a 743.500 euro, de chëi che plu che l mez vën da mesures de sustëni dla UE. La Repartizion provinziela Natura, cuntreda y svilup dl teritore dà oradechël cuntribuc per ntervënc per valorisé l cheder dla cuntreda tradiziunel. L ie udù danora 250 mile euro, dantaldut per mantenì tëc de scintles o de stram, sieves de lën y canai per blandé tradiziunei, mures a sëch y d’autri sistems de cultivazion tradiziunela.
USP
