Atualità
La Jonta da prò l regulamënt per Mont Sëuc y l program dla frabiches
USP – La regulamentazion per furné sun Mont Sëuc, da Sëuc sù, dëssa ji inant cun vel pitla mudazion ntan la sajon da instà. Nsci iel ncuei lunesc, 7 de juni, unì fat ora dala Jonta Provinziela. De autonn ulëssen to na decijion sun la ntroduzion de n daz y de n servisc de curieres a miëur marcià. Chësc ie stat l argumënt zetrel dla senteda da ncuei.
Cun de pitla mudazions unirà la regulamentazion per la streda de Mont Sëuc nce tenida inant ntan l instà. L ie unì fat ora de s’aré la streda dala 9.30 inant o te chël mumënt che la 700 plazes dai auti sal Compatsch ie plëines. Plu tert possen mo to la furnadoia da Sëuc sù o una dla cin curieres de linia sciche l fova dant. Samont resta inant la 20 curieres che mëina la jënt nchin ta Sautaria. Per chëi che muessa mené sù roba y per i rapresentanc ie unì dat prò che i posse furné nchin mesa la undesc sun la stredes nia asfaltedes y dut l di sun l’autres. Regulamentazions nueves iel nce unì dat pro per i patros de puscions, i fitadins, residënc y gesc’ che stà d’albierch. N cajo che la furnadoia essa da messé unì sareda per gaujes tecnics, à la Jonta Provinziela dat pro de lascé furné sun Mont Sëuc nchin a mile auti al di. La regulamentazion, cun la pitla mudazion jirà ndorva cun la publicazion tl boletin dla region y nsci mo dan la sajon da instà. De autonn sarà passà l ann de prova y per l inviern ulëssen de prò l regulamënt definitiv cun bonamënter n daz per la streda de Mont Sëuc. „Cun chël che unirà trat ite tres l daz ulëssen pité la curieres che porta ta Sautaria a n miëur priesc o gor debant“ à dit l Presidënt dla Jonta, juntan che n uël nce pitè chertes a bon priesc per la families.CËNT MILION DE EURO PER LA FRABICHES
Aldo dl bilanz 2004 uniral dat ora avisa 99,37 milion de Euro per la frabiches dla Provinzia de Bulsan. 38,2 milion ie bele resservei per lëures scumencei o che n ie tl lëur de finé, cun 31,3 milion vëniel finanzià proiec tl lëur. Set miilon ie udui dant per lëures nueves per chëi che n à bele finà la proietazion y 23 milion de Euro per lëures defin nueves. (cëla nce la lista junteda prò).
USP
