Atualità
L Statut Nuef de Autonomia- nce ti idioms gherdëina y badiot
La populazion ladina de Gherdëina y dla Val Badia possa da s’ën inant liejer l Statut Nuef de Autonomia y l Tratat de Paris dl 5 de setëmber dl 1946 nce te si lingaz dl’oma y i possa adurvé schiche strumënc de lëur per scrì tesc’ aministratifs ladins.
Cun chësta traduzions fates dal Ufize cuestions linguistiches dla Provinzia vëniel aplicà la norma de atuazion dl Statut y plu avisa l decret legslatif n.262 dl 22 de mei 2001 che ie de gran mpurtanza per i dërc dla populazion ladina. Chësc decret scrij dant che la Region y la Provinzia muessa nce publiché per ladin la desposizions de lege y la zirculeres che reverda diretamënter la jënt ladina dla Provinzia de Bulsan. Aldò dla delibra dla Jonta provinziela dl 27 de jené dl 2003 vën desposizions y tesc´ aministratifs nce ciancei ti idioms de Gherdëina y dla Val Badia. L Statut Nuef de Autonomia ie unit tradujà tl gherdëina dala dr.a Ingrid Runggaldier Moroder n cunlaurazion cun la dr.a Barbara Perathoner, y tl idiom dla Val Badia dala dr.a Ulrike Vittur. L Ufize cuestions linguistiches dla Provinzia Autonoma de Bulsan repurtea dal 1997 inant tesc´ giuridics y aministratifs tl idiom de Gherdëina schiche ënghe da agost dl 2003 inant tl idiom dla Val Badia. Chësc Ufize pieta sëuraprò cunsulënza linguistica y na banca dac che cuer l ciamp aministratif y giuridich. Un di fins prinzipei ie mplù chël de renfurzé la cunlaurazion cun l’autra istituzions ladines. Tramedoi libri vën dac ora dal Ufize stampa dla Provinzia: ndut iel unit stampà 6600 copies. L Statut Nuef de Autonomia ti idioms de Gherdëina y dla Val Badia ie da giapé debant a Bulsan, tl Palaz provinziel I, streda Crispi 3 (fax 0471 412220/21).USP
