Mussner: la streda dla Val Badia dëssa unida fineda per tëmp
USP – L 60% di lëures per la streda dla Val Badia nueva ie bele finei. Nchin a sën iel unì frabicà per 54,5 milion de Euro y nce sce n ie al mumënt n pue’tardives dessa i lëures unì finei via tl tëmp udù danora. Chësta nfurmazions à l assessëur ala stredes Florian Mussner ncuei, vënderdi ai 9 de lugio, dat inant ai ambolc y ai rapresentanc di chemuns tuchei dai lëures, pra n’ancunteda a Mantëna Todëscia.
La streda dla Val Badia dëssa unida fineda per tëmp, à dit la assessëur MussnerI lëures per i sies chilometri de streda cun cin tuniei che fova unic tenii sù da de plù smueies ntan l’ansciuda, va s´ën inò inat drët bën. L assessëur ai lëures publics Mussner à nfurmà i rapresentanc di chemuns tuchei dai lëures. Paroles de rengraziamënt ie unides dal assessëur per la bona culaburazion cun i chemuns y l unì ncontra di zitadins che à ntan i lëures me pudù se nuzé da vel ëura dla steda dla Val Badia. De plu smueies y l crëp scherpënt à tenì sù plu iedësc i lëures. Permez ai tëmps udui danora iesen tardives de trëi mënsc, purempò fejen cont de finè i lëures per tëmp, à sorissà Mussner. Cater de ndut cin tuniei ie bele furei tres, me pra l tunel 3 macia mo diesc metri per l furé tres, à spiegà l dirijënt dl proiet Julius Mühlögger. Al mumënt iesen tl lëur de mëter jù la stizes per n majer puënt. I tecnics Fulvio Pisetta y Aldo Marzola à pona spiegà plu avisa i pruvedimënc de segurëza. Te de pitli film an pudù udëi l sauté tl ari dl crëp pra l tunel 3 dla steda dla Val Badia y l mëter su de n puënt. Do l’ancunteda à i presënc pudù vijité l cantier.
La steda dla Val Badia, l cunliamënt de majera mpurtanza per la valeda, vën fata da nuef per rejons de segurëza. La vën valiveda, slargeda y segureda da smueis. Ti proscimi mënsc uniral deberieda cun i rapresentanc di chemuns cialà sce la streda dëssa passé tres Longega o sce la dëssa mené ntëur l luech via. L assessëur Mussner à ncuei pudù fé al savëi che la Jonta provinziela à metù a desposizion i fianziamënc per l ressanamënt dl toch de streda periculëus pra l Punt de Fer sota Pedraces. La steda dla Val Badia ie ntan i fins dl’ena nce davierta per i auti. Ntan i dis da lëur muessa i auti passé la stredes panoramiches. Sciche l ie ncuei unì fat ora cun i rapresentanc di chemuns, unirà la streda dla Val Badia tl’ultima ena de lugio y pona de agost giaurida de fin ai auti.
USP
Galaria dales fotografies
La streda dla Val Badia dëssa unida fineda per tëmp, à dit la assessëur Mussner
