Mussner y Chiocchetti uël miuré la culaburazion danter i Ladins dl Südtirol y dl Trentin
USP – L assessëur Florian Mussner se à inier domesdi, juebia 29 de lugio, ancuntà a Bulsan cun l cunselier provinziel trentin Luigi Chiocchetti. I doi rapresentanc ladins à rujenà sun la situazion atuela dla grupa de rujeneda ladina tla doi provinzies Bulsan y Trënt. Aldó de tramedoi rapresentanc ie l’ancunteda stata n var inant per na culaburazion che va inant sun basa istituzionela.
Luigi Chiocchetti y Florian Mussner (a man drëta) à rujenà di bujëns di Ladins tl Südtirol y tl Trentin.„La culaburazion danter i ladins, la mendranzes dla valedes de Cembra y Fersina muessa sun basa regiunela unì carateriseda da continuità“, nsci la vijion di doi politics. L cunselier Mussner ne ie nia me assessëur tla Provinzia de Bulsan ma nce assessëur regiunel per la mendranzes de rujeneda. Chësta ncëria unirà pieda do tla sgonda pert de legislatua da Luigi Chiocchetti de Fascia. I cuntac interladins ie mo da rafurzé y da purté te na posizion istituzionela, nsci la minonga di doi rapresentanc ladins. Mussner à te chësta ucajion rujenà dl’ancunteda di ambolc de duc i 18 chemuns ladins. Chësc gremium dëssa unì cherdà ite de utober y pona se ancunté uni tant. Nce l presidënt Durnwalder se fajerá inant per chësta cuestion, te si funzion de presidënt dla region. Per chël che reverda l recunescimënt dla „Union Generala di Ladins dla Dolomites“ aldò dla lege statela nr. 482/99, iel – aldò de Mussner – decontra, scebën che n l’à recunesciuda a Trënt. Sëuraprò ala culaburazion dla mendranzes tla doi provinzies, ulessen da pert di doi politics ladins tl daunì nce arjonjer na culaburazion cun d’autra mendranzes retoromaniches sciche chëles tli Grijons o tl Friuli. L ufize provinziel per la cultura a Bulsan à bele fat prim vares te chësta direzion. Nce l to pert di Ladins dla Dolomites ala „Scuntrada Rumantscha“ tl ann 2006 ie stat argumënt de discuscion. Nce te chësc cajo uniral da pert dla ripartizion de Mussner fat autri vares de preparazion. Chiocchetti se damanda de intensifiché la culaburazion danter la istituzions tl ciamp dla scola, sciche i istituc pedagogics. A Trënt an da permò nciarià n sëurastant ala scola ladina, na sort de ntendënt, per Fascia. Per mëter su na organisazion sciche la ie tl Südtirol, à l assessëur Mussner mpermetù aiut. N cont dl svilup dla rujeneda à Mussner purtà dant la vijion che i idiomes tla valedes ladines dëssa unì rafurzei, tl medem tëmp dëssa la rujeneda nce unì unificheda a livel aministratif.
Autri argumënc dl’ancunteda ie stai la furmazion di studënc fascians, che studieia tla facultà dla scienzes dla furmazion a Persenon, dl’Università de Bulsan, y la tofles sun la stredes di raions ladins tla doi provinzies. Riesc do la pausa da instà uël Mussner y Chiocchetti se ancunte mo n iede.
USP
Galaria dales fotografies
Luigi Chiocchetti y Florian Mussner (a man drëta) à rujenà di bujëns di Ladins tl Südtirol y tl Trentin.
