Assessëures ala scola n cont dl di europeich dla rujenedes
USP – Tl’Europa carateriseda da na culaburazion sëura i cunfins y l marcià globalisà, devëntel for plu mpurtant a cunëscer rujenendes. „Savëi da rujené de plu rujenedes porta vantages“, sorissea i assessëures provinziei ala scoles Florian Mussner, Luisa Gnecchi y Otto Saurer n ucajion dl di dla rujenees de duman dumënia, 26 de setëmber 2004.
I assessëures ala scola vëij chësc di europeich dla rujenedes de bon uedl. „L savëi de plu rujenedes ie mpurtant, nia me per ji de viac, ma dantaldut per to sù cuntat cun d’autra persones, per pudëi comuniché cun ëi, per se giamië speriënzes y sambën nce per avëi de majera pusciblteies tl mond dl lëur“, scrij Mussner, Gnecchi y Saurer te n scrit n ucajion dl di europeich dla rujenedes. Al mparé de rujenedes ti vëniel nce a scola y tla furmazion prufescionela for dat na majera mpurtanza, dij i assessëures. Da plu ani ie tl Südtirol bele unì metù a jì de plu proiec per mparé miec la sgonda rujeneda y l nglëisc. „I prim resultac ie stai drët positives, sculeies y genitores, ma nce i nsenianc y respunsabli de furmazion fova cuntënc“, nscì Mussner, Gnecchi y Saurer. Pra n cungres nteranziunel dla Università de Venezia sun l argumënt dla rujenedes fulestieres, vën l Südtirol udù sciche model n cont de rujenedes, dij i assessëures ala scola. „Tla scolina mpera i mëndri la sgonda rujeneda a na maniera drët lesiera – rujené de plu rujenedes devënta sciche n juech“ sorrissea l’assessëura Gnecchi. I assessëures ala scola lecorda che bel apuntin cun l di europeich dla rujenedes, mët nce man de lauré la retëura nueva dla Univesità de Bulsan Rita Franceschini. La retëura che à nstëssa de bona cunesciënzes tla rujenedes, ti dajerà n carater nuef ala università, nscì i assessëures. „La cumpëida di studënc tla Univesità de Bulsan ie inò cresciuda. Chësc uel di che l ie for de plu jëuni che à nteres a na furmazion te trëi rujenedes“, lecorda Saurer cun legrëza. Nce tla furmazion prufescionela an aldò dl’assessëura Gnecchi arjont de bon resultac cun i proiec per l mparé dla sgonda rujeneda, nsci sciche l’azion tudësch te berstot. „Rujenedes porta prò a n nteres per d’autra cultures y rujenedes. „Just te nosta provinzia ie la rujenedes n mesun dastramp mpurtant per pudëi mparé a se cunëscer miec un cun l’auter“ sorissea l assessëur Mussner.
