Atualità
Plates internet ladines por i parcs naturai dla Ladinia
USP - I dui parcs naturai Fanes-Senes-Braies y Pöz-Odles à sëgn ciafè sües plates internet por ladin. Tla Rëi zivica pon chirì fora i dui parcs naturai y tl menü prinzipal de chisc él da ciafè da sëgn inant ince l’opziun “Plates ladines”.
Les plates ladines dà ai vijitadus dötes les informaziuns sura la geologia, i biotops, les escurjiuns acompagnades y i.i. Le laûr de traduziun é gnü fat da Erika Pitscheider dl Istitut Ladin Micurà de Rü, sön inćiaria dl Ofize parcs naturai.Les plates dla Repartiziun natöra y contrada dla provinzia, che tol ite inće i set parcs naturai de Südtirol, po cumpedè plü de 165.000 vijitadus tratan l’ann 2003, chël ô dì n valur mesan de 450 vijitadus al dé. Tl 2004 (ćina a mez otober) é le valur mesan rové sön 618 vijitadus al dé cun valurs de mascima che röia sura 1000. En chësc ann él porchël bele plü de 180.000 surfer che à chirì sö chëstes plates internet.
An po inće rové ite sön les plates ladines sce an va ite sön la plata internet dla Rëi zivica de Südtirol www.provinz.bz.it y se chir fora le lingaz ladin. Te chësta plata él spo le link che se porta a vijité virtualmënter i parcs naturai dla Ladinia. Sot ala misciun internet www.provinz.bz.it/natur/naturparke o www.provinz.bz.it/naturparke pon chirì fora i dui parcs naturai.
Le raiun dl Parch Natural Fanes-Senes-Braies se sleria fora por trëi comuns ladins; tl Parch Natural Pöz-Odles tômel ite raiuns de bëgn sis comuns danter la Val Badia y Gherdëina. Por l’Ofize parcs naturai él porchël important da adorè inće le lingaz ladin te süa ativité.
Inće l’ Assessur provinzial Florian Mussner salüda cun gran ligrëza chësta iniziativa, soradöt sce an pënsa che avisa sön le terać ladin ciafun parcs naturai sciöche Fanes-Senes-Braies, olache al vëgn inće fat tröć proieć indirizà a categories desvalies, sciöche i mituns, i apascionà dla fauna y flora de chësc parch natural y inće por i amanć dles muntes, che tol ite na gran importanza inće sciöche atraziun por la jënt che va ion sö por munt. Insciö podaràn tl dagnì inće lì dötes les informaziuns atuales te nosc lingaz dla uma, le ladin.
SAN
