Atualità

Politica | 15.12.2004 | 16:13

Durnwalder rajona cun i ombolc ladins de promoziun dles mendranzes

USP - Ai 14 de dezëmber 2004 à le Presidënt dla Provinzia Luis Durnwalder invié i ombolc dles döes valades ladines a Neustift por rajonè dla promoziun dles mendranzes linguistiches. Al ê ince presënt l’assessur provinzial Florian Mussner. I argomënc prinzipai de discusciun é stà i proiec de promoziun dl lingaz y dla cultura ladina y ince la nominaziun de n comitê de coordinaziun. Al é gnü fat fora de realisé i proiec de promoziun adöm ala Provinzia. Do intenüda cun les provinzies interessades y cun le Consëi di Ministri déssel gnì metü sö n comitê de coordinaziun formè dai ombolc di comuns ladins.

La lege statala di 15 de dezëmber 1999, nr. 482, sön la sconanza dles mendranzes linguistiches tla Talia prevëiga de plü poscibilitês de promoziun por ći che reverda le lingaz, la cultura, les scores y inće i media de na mendranza. Tla incuntada cun i ombolć à le Presidënt dla Provinzia Luis Durnwalder orü savëi ći che i ombolć de Gherdëna y dla Val Badia pënsa dla presentaziun de de te’ proieć y de sciöche le comitê de coordinaziun por i ladins che vir tles Provinzies de Balsan (presciapüch 18.000 ladins), Trënt (6.000 ladins) y Belun (4.000 ladins) dess ćiarè fora. Al é gnü fat fora che i proieć de promoziun ti seturs dl lingaz, dla cultura, dla scora y di media dess gnì realisà cun la colaboraziun y le sostëgn dla Provinzia. La inćiaria d’ejaminé i proieć de promoziun dl grup linguistich ladin dess gnì surantuta dai ombolć ladins de Gherdëna y dla Val Badia, sce ara se trata de scomenciadies che reverda i ladins dla Provinzia de Balsan. Sce ara se trata indere de proieć che à da fà cun les provinzies vijines dess sambëgn inće i ombolć ladins de Trënt y Belun gnì trać ite tla coordinaziun. I ombolć dla Val Badia y de Gherdëna à perié Durnwalder de se mëte en contat cun i rapresentanć dles provinzies vijines por portè inant chësta chestiun. Naôta ch’al é gnü concordè la prozedöra cun les provinzies de Trënt y de Belun y ch’al é gnü tut n’acordanza cun le Consëi di Ministri pol gnì laorè fora y presentè proieć por la promoziun dla mendranza ladina.

USP

Galaria dales fotografies