Atualità
IIª Comisciun provinziala por la sconanza dla contrada: na ütia nöia sön la munt de Fanes
USP - La IIª Comisciun provinziala por la sconanza dla contrada à aprovè pro la sentada da inier, mertesc, ai 8 de forà 2005 la costruziun de na ütia nöia sön la munt de Pices Fanes tl comun de Mareo.
La majun é bele gnüda fata sö y śëgn pol inće gnì pié a man la costruziun dla ütia sön Pices Fanes aladô dl arat dla IIª Comisciun provinziala por la sconanza dla contrada. La ütia y la majun fej pert dla pastöra che vëgn adorada deboriada dai paurs di comuns de Braies, Mareo y Badia y fej pert dl Parch Natural Fanes-Senes-Braies y dl raiun “Natura 2000”. “De chësc él sambëgn gnü tignì cunt tl proiet” à dit Adriano Oggiano, diretur dl Ofize provinzial por la sconanza dla contrada. La Comisciun à dè dant prescriziuns por la costruziun dla ütia: le tët mëss gnì curì cun scianores y la ütia mëss gnì fata sö cun lëgn. La forestala controlarà che i laûrs vëgnes fać indortüra.USP
