Atualità

En gaujiun dl scomenciamënt dl ann scolastich nü organisëia le Zënter de competënza y i Zëntri por la promoziun dl lingac che se crüzia dl’integraziun di scolars che vëgn da d’atri Paisc n convëgn d’ajornamënt por i insegnac. L’incuntada gnará a se le dé en lönesc ai 7 de setëmber dales 14.00 tl’Eurac a Balsan en presënza di assessurs Mussner, Tommasini y Achammer.

Cun na conferënza pedagogica á metü man incö al 1 de setëmber l’ann scolastich 2015/16 dles scores de musiga. I assessurs por la scora Florian Mussner y Philipp Achammer á inaudé la sajiun musicala nöia adöm cun le diretur de Departimënt Peter Höllrigl y la direturia provinziala dles scores de musiga Irene Vieder tla sënta dla scora profescionala por l’agricoltöra a Auer.

Siegfried Rainer y Theodor Rifesser mëina nchin ala proscima veles ai 15 de nuvëmber i destins di chemuns de Natz-Schabs y Urtijëi. L assessëur provinziel per i chemuns à rujenà ncuei, prim de setëmber, cun i doi aministradëures de chemun per nriescer coche la sta cun i lëures ti doi chemuns.

Ares metará man en jöbia ai 03/09 a Roma les tratatives danter la Provinzia y l’aziënda Poste Italiane por la reorganisaziun dl sorvisc dla posta tl Südtirol. „L’obietif – insciö á splighé le presidënt Kompatscher – é chël da surantó plü competënzes che dess gní finanziades tres le pachet di 100 miliuns al’ann preodü dal’Acordanza de Milan.“

La Junta provinziala á tut la dezijiun da aprové un n miliun de euro implü por l’assunziun y la metüda a desposiziun de personal dër cualifiché tles impreses dl Südtirol. Do da n ann é le pröm bilanz dl proiet scomencé dala Provinzia positif: la pröma dotaziun de 1,6 miliuns de euro é bele gnüda adorada sö por ti garantí l’ocupaziun a 30 porsones dër cualificades te 27 imprejes.

La Junta provinziala á aprové incö al 1 setëmber la realisaziun de na staziun de control fissa por i camions da marcianzies sön l’autostrada dl Prener dlungia la sortida che porta a Sterzing.

Ti ultims agn é ince tl Südtirol aumenté l’importanza dla medejina paliativa, che reverda la cura, l’acompagnamënt y l’assistënza de paziënc gravemënter amará che ne respogn nia plü a tratamënc spezifics y che é te na fasa terminala. Incö á la Junta provinziala aprové na zertificaziun dl’esperiënza trienala dles cures paliatives por i doturs zënza na formaziun spezifica te chësc ciamp.

Cun incö al 1 de setëmber é Edith Ploner la presidënta nöia dl Consëi scolastich provinzial y che ará insciö la funziun de coordinaziun dles sentades plenares dl organ de consultaziun dla Junta provinziala sön tematiches che reverda le monn dla scora. Dl Consëi scolastich fejel pert rapresentanc di trëi grups linguistics dl Südtirol.

La tematica di migranc sciöche sfidada atuala mo ince sciöche n avenimënt dl tëmp passé, che á atoché diretamënter ince la realté dles valades ladines dan da n secul, sará tl zënter de na conferënza por talian cun l’espert Leonhard Voltmer tla sënta dl Museum Ladin a San Martin de Tor en vëndres, ai 4 de setëmber dales 20.30. L’entrada é debann.

En ocajiun dl De dl’Autonomia en sabeda ai 5 de setëmber deura le Consëi provinzial y l’Aministraziun provinziala por le secundo iade sües portes. La tematica prinzipla dl de sará la familia. Dlungia les ativités desvalies che an pó vijité ti palac provinziai vëgnel ince metü da jí n convëgn sön „l’autonomia y la resistënza“ y na premiaziun di maturanc plü lezitënc dl Südtirol.