Atualità

Cultura, turism, y sport é i trëi pilastri zentrai dla federaziun locala nöia „FederCultura Turismo Sport Alto Adige Südtirol“, che é gnüda fondada da püch dala federaziun dles cooperatives Confcooperative. Le presidënt Massimo Moretti ti á presenté da püch al’assessuria por l’sport Martha Stocker i fins dla federaziun locala nöia, sües ativités y intenziuns.

L’emergënza y les soferënzes de indöt prësc 60 miliuns de porsones che é tl sun sciampé da violënzes y maltratamënc é tl zënter dl De mondial di migranc ai 20 de jügn. Por l’assessuria Stocker é la chestiun di migranc na sfidada de dimenjiuns globales. „Impó ne dess l’Südtirol nia stlü i edli“,dij Stocker che damanda do comprenjiun y desponibilité da daidé i migranc y les porsones che damana asil.

Do da 23 agn a cé dl’EURAC dará Werner Stuflesser tosc jö süa inciaria sciöche presidënt dl’Academia Europeica da Balsan. Incö (19 de jügn) s’á Stuflesser incunté cun le presidënt Kompatscher che á orü le rengrazié personalmënter por „avëi contribuí dër tröp al svilup dl’inrescida te nosta Provinzia.“

La situaziun politica atuala tl Südtirol, tla Talia y tl’Austria, sciöche ince la colaboraziun cun les provinzies vijines tres le stromënt istituzional dl’Euregio é stá i temesc prinzipai dl’incuntada de inier da sëra (18 de jügn) a Roma danter le presidënt Arno Kompatscher y l’ambasciadú austriach René Pollitzer.

L’istituziun de na comisciun paritetica che laurará ala creaziun de n test de reforma dl Statut d’autonomia. Chësc é le resultat dl’incuntada da incö (18 de jügn) a Roma danter i presidënc dles Regiuns y Provinzies cun n statut spezial, danter chisc ince Arno Kompatscher, cun le Secreter de Stat por i afars regionai Gianclaudio Bressa.

„Nosc obietif é n azes internet asvelt sön döt le raiun dla Provinzia por düc i abitanc dl Südtirol tres na rëi de banda leria efiziënta y publica“, á dit incö (18/06) l’assessuria Waltraud Deeg tratan la presentaziun dla rëi de banda leria dl Südtirol. La costruziun dl’infrastrotöra gnará acompagnada da na campagna de sensibilisaziun.

Strades da jí a scora sigüdes, sigurté tl trafich cuotidian y na maiú sensibilité sön tematiches dla mobilité sostenibla – chisc é stá i obietifs prinzipai dles aziuns de sensibilisaziun da inann de „S.O.S Zebra!“. Ma cun les aziuns organisades dales Repartiziuns Mobilité y Sorvisc Strades, adöm cun l’Ökoistitut y la Polizia comunala él gnü arjunt 1.000 scolars y geniturs.

Incö, mercui ai 17 de jügn dl 2015 él gnü tigní la pröma proa scrita dl ejam de maduranza tles scores altes dles valades ladines dl Südtirol. Indöt 77 studënc y studëntes ametüs/des al ejame á podü chirí fora sce ai uro fá la proa por talian o por todësch.

La fondaturia dl Panay Fair Trade Center, Ruth FE Salditos, partner da plü agn dla cooperaziun al svilup dla Provinzia de Balsan, é stada chisc dis tl Südtirol. Incö (17 de jügn) ára incunté la direturia dl Ofize Chestiuns de cabinet Elisabeth Spergser por ti mostré n proiet che vëgn dötaurela realisé tles Filipines.

I suranstanc de dötes les Regiuns y Provinzies „nia ordinaries“ s’incuntará indoman (18 de jügn) a Roma cun i funzionars dla Presidënza dl Consëi di Ministri por rajoné dla reforma costituzionala. Por le Südtirol sarál presënt le presidënt Arno Kompatscher.