Atualità

Motivé i jogn y les jones da se dé jö cun i museums y sü contignüs y sensibilisé i museums sön i interesc dla jonëza: chisc é i dui obietifs prinzipai dl ann tematich 2015 „Young & Museum“ dla Repartiziun Museums y dl’Assoziaziun Museums Südtirol. „I museums dess ester n post d’incuntada, de vita y de barat por nüsc jogn“, á sotligné l’assessur Florian Mussner tratan la presentaziun a Balsan.

Tl cheder dla colaboraziun danter le Departimënt Educaziun y Cultura Ladina y les Scores de musiga ladines él gnü laoré fora le poem musical “Rundenì de lijëndes” por rapresenté musicalmënter la tradiziun de valüta dles liëndes ladines. Le resultat final gnará presenté dai scolars y dales scolares ai 20 y ai 21 de aurí a Urtijëi y ai 24 de aurí a San Martin.

Le comerz de vijinanza funzionëia tl Südtirol ciamó sön döt le raiun, por mantigní chësta situaziun laora la Provinzia te döes direziuns: da öna na pert cun normes d’atuaziun por garantí na politica comerziala de dorada lungia, dal’atra pert cun n aiüt diret por sostigní le refornimënt di alimentars de basa. Chësc é gnü splighé incö dal presidënt Arno Kompatscher te n’incuntada cun i media.

Döes scovertes importantes á fát l’ann passé le Ofize di Bëgns archeologics dla Provinzia che á descurí döes statues menhir dl Eté dl Ram (2.900-2.500 dan G.C.) de marmor de Lasa ciafades a Vetzan tl Vinschgau. Les statues é gnüdes presentades incö (10 de aurí) dal assessur por i bëgns culturai Florian Mussner y dala direturia dl Ofize Catrin Marzoli a Frangart.

63 maestri de schi, sis maestri de paslunch, 22 maestri spezialisá tl telemarch y 11 maestri de snowboard é gnüs premiá incö (9 de aurí) a Balsan dal presidënt dla Provinzia Arno Kompatscher. Indöt gnarál lapró 102 maestri nüs y maestres nöies, i diploms ti é gnüs surandá incö tratan la fiera „Pro Winter“ a Balsan.

La poscibilité da ti dé na familia a n möt/na möta é la chestiun zentrala dl’adoziun. Cun na campagna de sensibilisaziun nöia y le slogan „Na storia n pü’atramënter: mia adoziun“ á l’assessuria Martha Stocker presenté incö (09/04) chësta forma particolara de relaziun familiara por sensibilisé i zitadins sön chësta tematica.

Le cambiamënt dl clima é na sfidada atuala, a chëra che an mëss ti respogn cun mosorës efiziëntes. Öna de chësta mosöres é ComunClima, na zertifcaziun energetica planificada por sostigní i Comuns tl vers de n svilup ecologich. „Chi che investësc por sconé l’ambiënt ara vantaji tl dagní“; á sotligné l’assessur por l’ambiënt Richard Theiner incö (09/04) tratan la presentaziun dl zertificat nü.

www.14-18.europaregion.info: Chësta é la misciun dl portal dediché al centená dla Pröma Vera Mondiala dal’Euregio Tirol-Südtirol-Trentin. Sot ala seziun „Let’s talk“ él poscibl da ciafé vigni mëis temesc nüs cun plü domandes y respostes. Tl mëis de aurí nen vara dl rode dles ëres tratan la perioda de vera dal 1914 al 1918.

Sura 2.000 mituns y porsones jones cun problems de comportamënt é gnüdes curades te Südtirol tl 2014. Te n’incuntada cun i media él gnü presenté incö, mercui ai 8 de aurí , les scomenciadies y i proiec por renforzé le sostëgn dantadöt de porsones jones cun patologies psichiatriches.

Grana é stada l’afluënza ala show di ponjins tl Museum Natöra a Balsan che é jüda a fin en Lönesc de Pasca, ai 06 de aurí. Cun indöt 18.636 entrades é stá i vijitadus chësc ann sura le dopl tan tröc co tratan l’ediziun 2011. Al é le numer plü alt de vijitadus dala pröma mostra di ponjiuns dal 2001, tröpes é stades les families y i mituns.