Atualità

I ofizi y i sorvisc dla Provinzia restará stlüc tratan i dis de festa de Pasca da en Vëndres Sanc ai 3 cina al Lönesc de Pasca ai 6 de aurí y dauriará indô regolarmënter en mertesc ai 7 de aurí.

Te duta la provinzia scumëncerà l servisc stredes tl’enes che vën a fé lëures de mantenimënt straurdeneres. Tl raion Salten/Scilier uniral nvestì 1,27 milions de euro per lëures sun la stredes provinzieles y 1,31 milions per ntervënc sun la stredes stateles.“A chësta moda ulons njinië ca la stredes per i zitadins y la zitadines, acioche les sibe segures y adatedes a furné”,dij l assessëur Mussner.

En jöbia y en vëndres, ai 26 y 27 de merz, á i partis y les rapresentanzes politiches albü la poscibilité da dé jö i sëgns tradizionai dles listes por les lites comunales ai 10 de má. Incö (30 de merz) él gnü trat fora le ordin di sëgns dles listes por la publicaziun sön i placac d’informaziun por les lites.

Ciamó tl 2015 gnarál daurí tles 20 sëntes di raiuns sanitars provinziai na consulënza sanitara locala por l’assistënza y la cura che ará le compit da informé y da pité consulënza diretamënter söl post ai componënc de families che adora sostëgn y assistënza.

I dui Museums Ladins „Ćiastel de Tor“ (San Martin de Tor) y „Ursus Ladinicus“ (San Ciascian) restará daverc dai 6 ai 30 de aurí ma por tlasses scolatisches y nia por vijitadus singuls.

Cun na grafica nöia y na ligna de aziuns mirades al aumënt dla segurëza sön strada él la Provinzia de Balsan che á ince planifiché por chësc ann na ligna de mosöres de sensibilisaziun tl contest dla campagna „No Credit“. L’assessur Florian Mussner y le diretur Valentino Pagani á presenté incö ai 30/03 i contignüs nüs, adom al procuradú general Guido Rispoli y le primar Manfred Branstätter.

Da incö (27 de merz) sarál poscibl da descurí les arees dles Dolomites patrimone mondial dl Uneso diretamënter da ciasa cun n iade virtual sön Street View de Google Maps. „La Fondaziun Unesco é la pröma istituziun dla Talia che pó s’anuzé dl Trekker Loan Program de Google“, sotlignëia l’assessur Richard Theiner, presidënt dla Fondaziun Dolomites Unesco.

Te süa secunda „tlausöra“ dl 2015 á la Junta provinziala spartí incö (27 de merz) ressurses ajuntives por 213 miliuns de euro a bëgn di seturs dl’assistënza ala cura (60 miliuns de eruro), dla sanité (38 miliuns), dl’assistënza ales families (10 miliuns) y dl frabiché abitatif (50 miliuns).

La Junta provinziala mët a desposiziun por le 2015 indöt 45 miliuns de euro por la costruziun de frabicac nüs. I programs d’intervënt é gnüs aprová incö (27 de merz) tla sentada de tlausöra dla Junta sön proposta dl’assessur Christian Tommasini. Por le momënt vëgnel lauré sön 59 frabicac nüs, la priorité reverda les scores.

187 operes, investimënc por indöt 380 miliuns cina le 2019 cun les strades dl Prener, dla Val de Puster y dla Val Venosta sciöche priorités prinzipales: chësc é le contignü prinzipal dl plann plurianual 2015-19 dla Repartiziun Infrastrotöres che é gnü aprové incö (27 de merz) dala Junta provinziala. L’entrada dla Val Badia é lapró.