Atualità

Inier (24 de jügn) à na comisciun de storics che laôra dal 2011 incà por porvè da identifiché les porsones sopolides tratan l’epoca dl nazism tla tlinica psichiatrica de Hall tl Tirol, presenté süa relaziun finala. “Danter les 228 porsones sopolides nen él 46 che vëgn dal Südtirol”, dij la direturia dl Archif provinzial Christine Roilo, che fej pert dla comisciun di storics.

Le proiet suraregional “Violënza tla vedla eté” danter Tirol y Südtirol gnarà stlüt jö en mertesc ai 1 de messé cun n convëgn tla Université de Balsan. Tratan la daurida gnaràl portè dant dales döes assessuries por la sanité Martha Stocker y Bernhard Tilg (Tirol) i resultać dl proiet.

Tl Museum Ladin Ciastel de Tor a San Martin ie la geologia y la storia dla furmazion dla Dolomites tl zënter uni merdi dai 1 de lugio ai 2 de setëmber. Danmesdì possa la/i vijitadëures analisé pieres y fossii locai, domesdì pieta l Museum n culaborazion cun l Ufize parcs naturei na jita meneda sun l troi geologich de Sas de Putia. L ie de bujën de se prenuté.

Ćiarè do ales previjiuns dl tëmp te Südtirol devënta tres plü saurì: insciö n’él nia ma gnü amplié da pert dl Sorvisc meteo dla Provinzia la plata internet cun na verjiun mobila por zelulars, mo da śëgn inant pon inće lì do les previjiuns dl tëmp cun l’app nöia „Meteo Südtirol“.

Le museum storich – cultural de Ćiastel Tirol vëgn inserì tl’Aziënda museums provinziai: chësta dezijiun à la junta provinziala tut incö, mertesc ai 24 de jügn. Cun chësta mudaziun podaràl gnì scemplifiché tl dagnì les prozedöres aministratives y la gestiun unitara di museums provinziai. Implü él inće gnü aprovè le program por le svilup rural 2014/2020

La junta provinziala à aprovè incö (mertesc ai 24 de jügn) indöt 13 miliuns de euro por finanzié i stipendiums por studënć por le proscimo ann academich. L’ultimo dé por presentè les domandes por n stipendium é ai 31 de otober.

Döes é les scomenciadies culturales por mituns sön le program dl Museum Ladin tratan Döes é les scol’isté: da öna na pert vëgnel organisé vigni mercui domisdé "Sön i fostüs dla laûrs preistorica" dal Museum Ladin "Ursus Ladinicus" a San Ćiascian, dal’atra pert organisëia le Museum Ladin "Ćiastel de Tor" le danmisdé “Le museum por mituns dai 5 ai 10 agn” vigni jöbia de messé y agost

„Nos düć messun renforzè deplü le lian danter la popolaziun locala y le patrimone mondial Unesco dles Dolomites”: chësc le messaje dl assessur Richard Theiner tratan süa vijita al parch natural dles “Trëi pizes de Lavaredo”. La daurida dla mostra sön chësta tematica é preodüda te cört tëmp.

Da indoman, mertesc ai 24 de jügn, él poscibl da ciafè i libri nüs cun i orars di mesi dl trasport publich por l’isté y l’altonn 2014. „I libri cun i orars publics é la basa por l’organisaziun dl trasport publich y vëgn anuzà tres ion da tröć passajiers”, spliga l’assessur por la mobilité Florian Mussner.

L’assessur por i laûrs publics Christian Tommasini à presentè incö tratan na conferënza stampa a Balsan le program dles operes sön strada che gnarà scrites fora ti proscimi trëi agn.