Atualità

USP - Danter l’ater à la Junta provinziala aprovè incö le program por la realisaziun dles operes publiches sön strada por i proscimi cinch agn: insciö él gnü inserì sön la lista cun la majera priorité l’entrada dla strada tla Val Badia dala strada statala a San Laurënz, che dess gnì scrita fora tl 2015.

Na dezijiun tuta incö, mertesc ai 17 de jügn, tratan la sentada dla Junta provinziala é stada l’aprovaziun dla partezipaziun al finanziamënt da pert dla provinzia ales spëises por la gestiun dl zënter de documentaziun sot le monumënt dla Vittoria a Balsan.

USP – Indöt 272 mituns y mitans à metü man en sabeda, ai 14 de jügn i ejams finai dla scora mesana. Tles cater scores altes te Gherdëna y tla Val Badia él indöt 82 scolars che fajarà en jöbia, ai 18 de jügn la pröma proa scrita di ejams de maturité.

USP – Dai 15 de jügn inant vara indô da tó les corieres de coliamënt suraregional che porta dala Val Passiria sura le Ju dl Rombo ćina tla pert austriaca de Sölden. Le proiet suraregional dl Südtirol y dl Tirol é pié ia dan da dui agn y é bele gnü anuzé te dui istà dötadöm 35.000 passajiers (20.000 ma tl 2013).

Usp – En ocajiun dl Dé mondial cuntra la violënza sön les porsones atempades recorda l’assessuria Martha Stocker les scomenciadies locales dl proiet interregional “Violënza tla vedla eté” danter Südtirol y Tirol. Le fin dl proiet é la sensibilisaziun dla popolaziun. “Les vitimes y düć i testemoni de violënza sön jënt atempada dess segnalè vigni maltratamënt telefonan al numer vërt”, dij Stocker.

“Nix lesen, nix schreiben, nix gut”: Chësc é le titul dl liber che é gnü publiché dal Ofize Formaziun Permanënta dl Departimënt Cultura todëscia adöm ala organisaziun “Alpha Beta – Piccadilly” y che à sciöche tematica prinzipala l’alfabetisaziun de migranć. Le liber gnarà presentè la proscima jöbia, ai 19 de jügn da öna dles auturies adöm cun l’assessur por l’integraziun Philipp Achammer.

Cun la fin dl ann scolastich vëgnel inće ajornè i orars di mesi dl trasport publich. Por podëi ti jì adincuntra a na presënza plü ampla de passajiers sön les trates che porta a traverć de escurjiuns él gnü aumentè i mesi de trasport publich tratan les ores de aorela cörta y les fins dl’edema.

USP - „La scora é rovada!“ Cun indoman, vëndres ai 14 de jügn se röia por la maiù pert di scolars dles scores elementares, mesanes, altes y dles scores por les profesciuns l’ann scolastich. Inće por i mituns dles scolines pëia ia dai 14 de jügn inant les vacanzes da d’isté. Por la fin dl ann de scora ti aôda insciö i trëi assessurs por la scora Mussner, Achammer y Tommasini a düć döt le bun.

USP - Vare nü tl prozès de reforma dla politica de sostëgn dl’economia. La junta provinziala à tut la dezijiun da daurì danü l’azès al fonds de rotaziun por le setur dl turism. "Por mirit dles regoles nöies - sotrissëia le presidënt dla Provinzia Kompatscher – sarà le fonds plü efiziënt, flessibl y finanziariamënter sostenibl por n tëmp lunch".

USP – Da püch él gnü publiché le calënder cun i cursc de ajornamënt por i colaboradus y volontars tl setur sozial por l’altonn 2014. Le calendër é gnü realisé dal Sorvisc svilup personal dla Repartiziun politiches soziales.