Atualità

USP - Tl mpëni acioche la jënt ebe de plu da lëur, à la Jonta provinziela (NCUEI) ai 04 de merz dat pro cursc de spezialisazion prufesciunela. Tla proscima sentedes dëssel unì dat pro pruvedimënc per l ressanamënt de cuatieres y per purté inant plu riesc l barat de cuatieres fai su dala Provinzia cun puscions de vedla casermes.

USP – La Jonta provinziela à (NCUEI) ai 04 de merz dat pro l program dla nfrastrutures per la rë de culegamënc internet a slune. Sun pruposta dl assessëur Florian Mussner uniral ntan l 2013 fat lëures per n custimënt de 8.170.000 euro. Per i lëures tla Val Badia y te Gherdëina iel chëst ann udù dant na nvestizion de belau na milion de euro.

USP – Chi che ulëssa ntan l proscimo ann de scola, 2013/14 mparé a suné n strumënt o fé lezions de cianté, possa ntan l mëns de merz se scrì ite ala scoles de mujiga. La iscrizions tla scoles de mujiga de Gherdëina y dla Val Badia vën tëutes su (da NCUEI, 4 de merz) nchin ai 28 de merz.

USP - Tl palaz provinziel Widmann a Bulsan à (NCUEI DOMESDI) ai prim de merz scumencià l cunvëni de doi dis sun metodologies etnografiches per nrescì y fé al savëi l patrimone culturel nia materiel. L cunvëni ie metù a jì dal Museum Ladin y dal’Assoziazion etnografica dl Südtirol EVAA ie nasciù dal proiet transnaziunel E.CH.I. (ethnografies talianes-svizeres) te chël che l Museum Ladin se à dat ju cun l patrimone nia materiel, tradizions y usanzes de Gherdëina. L cunvëni va inant nchin sada ai doi de merz da mesdì.

USP – L suzes dl trio de ciantarines “Ganes” da La Val à purtà Maria Moling, Elisabeth y Marlene Schuen sun de gran palcs a livel nternaziunel. Si atività y si produzion nueva ie stai argumënt de n’ancunteda (NCUEI) ai 26 de fauré cun l presidënt dla Provinzia Luis Durnwalder tl palaz Widmann a Bulsan.

USP – Sun la plata web www.provinzia.bz.it/ferien iel da abiné de plu prupostes aldò de chëles che mutons y mutans, jëuni y jëunes y families dl Südtirol possa se mëter a jì l instà. L Ufize provinziel per jëuni à metù a jì chësta plata web per pité n grum de nfurmazions y prupostes sun: tëmp liede, ucajions per lauré, viagë y mparé d’instà.

Pruzedures nueves per mudazions ala plann urbanistich chemunel, la posizion dla Jonta provinziela n cont dla stazion dla furnadoia nueva da Persenon sun la Plose y la detlarazion che Südtirol ne à plu degun caji de rabia ie stai i argumënc de majer nteres da pont de ududa ladin, ora dla senteda dla Jonta provinziela, che l presidënt Durnwalder à prejentà te cunferënza stampa.

USP – La Jonta provinziela lëura te chësc tëmp for inò a inuvazions dla lege urbanistica. Te si senteda da (NCUEI) ai 25 de fauré iel unì fat ora de mudé la pruzedures canche la se trata de mudazions al plann urbanistich chemunel.

USP – Sce l vën fat na furnadoia da Persenon nchin sun la Plose ie la Jonta provinziela dla minonga che chësta dëssa muever pra la stazion dla ferata. Davia che l se trata de n proiet pilot per taché adum ferata y furnadoia, à la Jonta provinziela (NCUEI) ai 25 de fauré nce dat pro de dé n finanziamënt nchin al 75 percënt.

USP - Davia che ntan i ultimi doi ani ne iel nia plu unì su caji de tieres tuchei dala malatia dla rabia, à dut l dl Südtirol pudù unì detlarà raion nia tucà da chësta malatia di tires salveres.