Atualità

USP – I sculeies dl Lizeum d’ert cun Scola prufesciunela de Urtijëi à ntan l’ena passeda fat scultures de dlacia per n cuncors metù a jì n culaburazion cun la lia turistica y l chemun. L prim pest à venciù l scultura dl auto VW Käfer. Ai sculeies ti iel cun chësta scumenciadiva unì pità na ucajion particulera de nseniamënt, per l zënter de Urtijëi pieta la scultures na bela atrazion artistica.

USP - Nchin ala fin de jené possa la lies damandé n cuntribut provinziel per judé a finanzië ativiteies tl ciamp dla cultura ladina ntan l 2012. N mierculdi ai 25 de jené vëniel tla Val Badia - y n lunesc ai 30 de jené te Gherdëina - pità n servisc de nfurmazion y aiut per fé la dumandes, ulache n posse nce les de ju.

USP – Ntan l inviern vëniel laurà y anjenià ca l daz sun la streda dl jëuf dl Stelvio per vester anjeniei per l instà. Do la senteda dla Jonta provinziela à l presidënt (NCUEI) ai 09 de jené cunedì che la provinzia ujina de Sondrio ie a una cun chësc pruvedimënt.

USP – Sce la Provinzia de Bulsan nuzea si puscibltà de smendrì la chëutes sun l auto, iel da se aspité che de majera mprejes che mprësta auti ruve adalerch cun si sëntes. Chëstes unissa a mance tla regions ujines. L Stat à tla regions zënza autonomia straicà la pert dla chëuta sul penzin che ti va a provinzies y chemuns. Dla defrënzes danter regions y dla mudazions per la provinzia de Bulsan uel Durnwalder rujené te si ancunteda cun l presidënt di ministri Monti.

USP – Te si prima senteda dl ann nuef se à la Jonta provinziela (NCUEI) ai 09 de jené da ju cun i argumënc che unirà tratei ntan doi dis de tlausura ala fin dl mëns. Priorità à te chësc mumënt la cunseguënzes dla liberalisazions dl Stat sun la realtà economica de nosta provinzia. Argumënc dla senteda ai 26 y 27 de jené sarà nce la familia, l’imigrazion y seguré la stieres.

USP – Nchin ai 20 de jené possen mo dé jù prupostes per l cuiertl de doi libri nueves de leteratura ladina. Per chësta segonda pert dl cuncors “Autëures Ladins Scrij”, scrit ora dal Assessorat provinziel ladin, ie da vëncer de ndut 2.000 euro y de plu libri da crì ora.

USP - Le Presidënt dla Provinzia Luis Durnwalder à (incö) ai 5 de jenà metü en funziun adöm cun l’assessur Florian Mussner y l’assessur Hans Berger sön Plan de Corones le pröm punt zentral de fires otiches dl Südtirol. Tres punc zentrai sciöche chësc po l’internet aslöm gnì portè dai manajadus dla banda leria - y dla telefonia mobila tres la rëi de fira otica tla periferia. A chësta moda miorëia sides la cualité che la segurëza dl coliamënt.

USP - Intenüda de n ann, passa n miliun de euro investis ti intervënc d’adatamënt y alestimënt dl zënter de documentaziun; colaboraziun danter Stat, Provinzia y Comun de Balsan: chisc é i contignüs prinzipai dl’acordanza sön le monumënt por la vitoria firmé incö (ai 3 de jenà) tl Palaz Ducal. An po mëte man cun la realisaziun dla mostra ti locai sotite: "Al dess deventè n avenimënt, delibré da süa ciaria ideologica y la jënt dess podëi pormez", à sotrissé l’assessuria provinziala Sabina Kasslatter Mur.

USP – Cun la fin dl ann va Theodor Rifesser, l diretëur dl Servisc de Inovazion y consulënza dla Scola Ladina (ex-Istitut Pedagogich Ladin) n pension. La direzion de chësc Servisc passerà cun jené 2012 al ntendënt dla Scola Ladina. L’assessëur provinziel ladin lauda Rifesser per si atività pionieristica sciche prim y ultimo diretëur dl Istitut che à pità material didatich y furmazion ai nsenianc dla scoles ladines.

USP – Te si ultima senteda dl ann à la Jonta provinziela, (NCUEI) ai 30 de dezëmber dat pro na lingia de pruvedimënc. L presidënt Durnwalder à riesc do la senteda prejentà i ponc de majer nteres.