Atualità

USP - La Biblioteca provinziala Teßmann y la ciasa edituria Athesia inviëia ala presentaziun liber „Wege zur Kunst“ de Sebastian Marseiler, ai 7 de jügn 2011 dales 8 da sëra ta Biblioteca provinziala a Balsan.

USP – Tl Museum Ladin Ciastel de Tor iel (ncuei) ai 27 de mei unì giaurì una dl’atrazions plu mpurtantes da chëst ann, la mostra sun la ferata de Gherdëina danter lecorc y vijions. 95 ani do che chësta ferata fova furneda l prim iede possen jì a ti cialé a modiei, documënc uriginei, video y passa 100 fotografies. Nchin ala fin de utober puderan tl Museum Ladin nce paredlé la vijions da ntlëuta cun proiec de na ferata al didancuei.

USP - Chëst ann d’autonn uniral tenì la cumpëida dla jënt per udëi tan de persones che viv te nosta provinzia y coche les ie partides su danter la grupes de rujeneda. L assessëur provinziel ladin nvieia culaburadëures di media a na sëira de nfurmazion y sensibilisazion n merdi, 31 de mei, dala 6 da sëira sun Jëuf de Frea.

USP – A Urtijëi à (ncuei) ai 24 de mei messù unì fermà i lëures y sarà n cantier ajache l ne ie nia unì garantì la segurëza di lauranc. I ispetëures dl Ufize provinziel per scunanza tecnica dl lëur à messù tò chësc pruvedimënt ajache l manciova defin la mesures de segurëza y ajache l ie unì frabicà zënza respeté la regules scrites dant per lege. De plu lauranc à laurà a na autëza de feter 10 metri de autëza zënza vester segurei.

USP – 7.507 sculeies dala terza elementera nchin ala cuinta tlas dla scola auta à chëst ann fat pea l cuncors „Kangaroo dla matematica“ per la scoles de rujeneda tudëscia y ladina. Danter i sculeies dla terza tlasses mesanes à venciù Klaus Prinoth dla scola mesana de Urtijëi che à arjont l miëur resultat de duta la categuries. N merdi (ncuei) ai 24 de mei ie tl palaz Widmann a Bulsan unì premiei 55 sculeies.

USP - Per museré la cumpetënza dla rujenedes tla scoles ladines à l Cumité per l’Evaluazion nvià via n’analisa sun basa scientifica. I resultac sun la cumpetënza dl tudësch, talian y ladin di sculeies dla scoles autes unirà prejentei n mierculdi ai prim de juni tl’Università a Persenon. Ala prejentazion cun i prufessëures Rita Franceschini y Pasquale Della Rosa ie nviei duc i nteressei.

USP – L barat danter l Stat y la Provinzia va inant. Da permò iel unì sotscrì n’acurdanza che la Provinzia frabica, concia su o compra sies casermes per i Carabinieri y la Polizia, y giapa lessù puscions stateles che à l medemo valor. “Chësta puscions ie de gran mpurtanza per l svilup de nosta ziteies y luesc” dij l presidënt Luis Durnwalder. Una de chësta casermes unirà nce cumpreda a Badia.

USP – Chisc dis vëniel sun la streda dl jëuf de Frea, dala pert de Corvara y sun la streda dla Val Badia jit inant a museré l deslivel. Ntan chisc lëures, che ie udui dant nchin ai 17 de juni iel da fé cont che la streda messerà uni tant unì sareda de fin o che l sarà a aspité pra n semafer.

USP - Ferates nueves, promozion y sburdla economica tres sustëni ala produzions de films tl Südtirol, l program per aspité demanco te spedel, bonus de cubatura y l bilanz dl zënter per avisé segures. Chisc ie stai i argumënc prinzipei che l presidënt dla Provinzia Durnwalder à prejentà te cunferënza stampa, ncuei ai 23 de mei riesc do la senteda dal Jonta provinziela.

USP – La Jonta provinziela uel sëurantò l bonus de cuabatura udù dant dal Stat ma me sce l vën nce fat n ressanamënt per sparanië energia. “Chësc pruvedimënt dëssa nce purté vantajes al ambient y ala cumenanza” à sorissà (ncuei) ai 23 de mei l presidënt Durnwalder do la senteda dla Jonta provinziela.