Atualità

USP – Danter la feter 500 ideies che ie unides mandedes ite tres n cuncors per n cialé ora nuef l relief de Mussolini sun l palaz dla finanzes a Bulsan, à la cumiscion nciarieda cris ora cin prupostes. Ai 18 de auril (NCUEI) ie chësta prupostes unides prejentedes ala Jonta provinziela che valuterà ciuna idea che dëssa unì realiseda.

USP - Manco muvimënt de auti y plu cualità de vita ie stat l pensier che à cumpanià NCUEI domesdì (16 auril) la giaurida dl prim toch dla zircunvalazion de Persenon. N lunesc puderà passé i prim auti. L presidënt dla Provinzia Luis Durnwalder y l assessëur ai lëures publics Florian Mussner à deberieda cun l ambolt de Persenon tenì la zeremonia y festejà la revalutazion dla zità.

USP – 162 maestri de schi nueves i anjeniei per l nseniamënt sun i purtoies. Tl cheder dla fiera „Prowinter“ à l assessëur Hans Berger (NCUEI) ai 15 de auril pudù sëurandé i diploms a 72 maestri de schi alpin, 14 maestri de podejé, 19 maestri de snowboard y 28 diretëures dla scoles de schi. 18 maestri de schi à stlut ju na spezialisazion per lauré cun mëndri. Danter i diplomei nueves iel de ndut 33 ladins.

USP – Da n merdi ai 19 nchin sada 23 de auril uniral de nuet salansà i tuniei sun la streda de Gherdëina da Tluses ite. Per via de chisc lëures puderan me passé i tuniei te una direzion al iede.

USP – Ciun che dëssa vester l svilup urbanistich de Gherdëina ie unì studià da grupes de lëur di chemuns de Gherdëina y chemuns ujins, cun l sustëni dl’Academia Europeica EURAC. I resultat, metù adum tl cunzet tlamà Masterplan per Gherdëina ie unì sëurandat ufizialmënter ai ambolc de Sëlva, S.Cristina, Urtijëi, Ciastel y Laion per l’apruvazion y per la realisazion. Per l assessëur provinziel Laimer ie chësc n strumënt inuvatif de planificazion urbanistica de ejëmpl nce per d’autri raions.

USP – Canche i mplanc portamont sera d’ansciuda, ne iel mo nia gheneda sun i purtoies y sun la montes. Nscila iela inò stata n lunesc de chëst ena (ai 11 de auril): sun Plan de Gralba à culaburadëures dla Furestela fermà su set motoslites che ova fat la Sellaronda. Da pert dla stazion dla Furestela de Persenon vëniel lecurdà che de tel raides cun la motoslites ie pruibides per lege ti raions sota defendura y che l vën fat cuntroi dedichei.

USP – L’ultimo tòch dla strada dla Val Badia dan rové a Picolin che ne n’ê nia ciamò gnü miorè, vëgn deslarié i proscimi mëisc. Tratan i laûrs che é odüs danfora cina d’agost, po i auti ma passè te öna na direziun al iade.

USP – Al valor culturel de nosc raion tla Dolomites fova dedicà l cuncors de scrì per ladin per la scoles dla provinzia de Bulsan y de Trënt. Tla trëi categuries à venciù Stefano Rizzi dla Scola auta de Poza, Maximilian Palfrader dla scola mesana de Al Plan y Emilia Bonata y Tatjana Runggaldier dl’elementera de Sëlva. La premiazion unirà tenida ai 29 de auril te Sëlva.

USP – I campionac dl mond di artejans a Londra y la mostra di artejans te Gherdëina ie stai argumënc dl’ancunteda danter l assessëur provinziel per l artejanat y i respunsabli dl’assoziazion provinziela per l artejanat LVH.

USP – N var inant à fat l proiet dla cherta sanitera-cherta di servijes. Dal 11 de auril iel cun chësta cherta mesun se nuzé de na lingia de servijes digitei che va dala borses de studi, la borses dl lëur nchin ai cuntribuc per l ulentariat. Te chësta prima fasa ulache la jënt possa mparé a cunëscer i servijes E-government, iel nce mesun se nuzé di servijes ala vedla maniera cun username y password.