Atualità

USP – La scola d’ert Cademia de Urtijëi à abù suzes pra l cuncors provinziel de depënjer metù a jì a livel de Südtirol. Danter i premiei de plu categuries iel nce trëi sculees d’ert a Urtijëi.

USP – Da n sada ai 9 nchin dumënia ai 17 de auril vëniel a livel talian tenì l’ena dla cultura. Passa 2500 istituzions pieta ntan chëst’ena ntredes debant. Vel scumenciadives unirà nce pitedes tla provinzia de Bulsan. “Jan de viers dla capitela europea dla cultura 2019, ie chësta manifestazion na bona ucajion per mustré su la cultura” dij l’assessëur provinziel Tommasini che à nvià via la candidatura.

USP – N cont dla persones che mucia dal’Africa dl nord al costes dla Talia, vëniel a se l dé na situazion nueva. Do la tratatives danter Stat y regions, ulache n sëira (6 auril) à nce rujenà pea l vizepresidënt Hans Berger, tulerà la Talia na streda nueva dajan ora lizënzes de sujurnanza a tëmp. La planificazion per la regions devënta a chësta maniera plu cumplicheda, ma perchël toma l problem di zëntri de identificazion.

USP - Dan doi ani fovel unì spartì la ncëria da ispetëura y diretëura dla scolines ladines tres la lege provinziela nueva sun ala formazion. Chisc dis à Hannelore Insam venciù cun gran merit l cuncors per sëurandé da nuef la ncëria da diretëura. Chësta stiera cumporta la urganisazion y l svilup urganisatif per 743 sculeies cun 104 culaburadëures tla 17 scolines dla valedes ladines.

USP – Co che dëssa unì furmei i nsenianc ladins vëniel ncuei (6 auril) tratà te n cungres a Persenon. Cun chësc cunvëni vëniel festejà i 10 ani dla Repartizion ladina d’Università y i respunsabli plu auc dl’università cun l assessëur provinziel ladin à te chësta ucajion mpermetù sustëni per svilupé mo inant la repartizion ladina. Ntan l di vëniel paredlà reformes dl sistem furmatif ti raions de mendranza ujins y dat lerch à prupostes nueves che dëssa mustré su la streda dla repartizion ladina per l daunì.

USP – Tl proscimo ann de scola saral 27 sculëis de plu tla scoles autes ladines. La cumpëida generela di sculeies dala scolines nchin tla scoles autes sarà de setëmber cun de ndut 3312 sculeies, ënghe de 27 majera. L aumënt de iscrizions vën valutà dai respunsabli dla scola sciche sëni de crëta de vies dl sistem scolastich ladin cun l nseniamënt de plu rujenedes.

USP – L plann per stravardé l tlima vën cuncretisà n var al iede dala Jonta provinziela. Dal 13 de juni jirà n drova la regulamentazion nueva n cont de adurvé energia per frabiché cëses. “Da mez juni ne vel nia plu l standard plu bas de cësa tlima C, ma chël de cësa tlima B”, dij l assessëur Michl Laimer. L ie mpurtant che i patrons de sebe per tëmp de chësta nuvità.

USP - N juebia ai 7 de auril se anconta i sculeies dla valedes ladines tl stadio dala dlacia de Sëlva per n turnoi interladin de hockey.

USP – I sculeies di Istituc per l cumerz de La Ila y Urtijëi à fat na lezion de economia cun l assessëur provinziel ai lëures publics Florian Mussner. I maturanc da chëst ann à abù gran nteres per la cunseguënzes che avenimënc tl mond à nce per nosta economia locala.

USP – L dërt de sanità muessa vester unfat per duc i zitadins. Per chësta rejon uniral analisà y tratà la regules sun l lëur liede di dutores cun la categuries nteressedes. Chësta dezijion à (ncuei) ai 4 de auril tëut la Jonta provinziela do che de plu zitadins se à lamentà che l fossa da aspité enes per n terminn te spedel, ma sce n paia, dëssen giapé riesc la vijita privata.