Atualità
-
Vënderdi 2 de auril ufizies provinziei sarei
USP – Per la festes de Pasca resta i ufizies dla Provinzia sarei ntan dut l di de Vënderdi Sant, 2 de auril. I giaurirà pona inò merdi ai 6 de auril.
-
Borses de studi y pesc’ per studënc: dumandes nchin ai 7 de auril
USP – Studënc à mo dl’aurela nchin ai 7 de auril per damandé ala Provinzia de Bulsan borses de studi y pesc’ per l rendimënt ntan l ann academich 2009/2010.
-
Turism tla provinzia de Bulsan – statistica 2008/09
USP – L Istitut provinziel de statistica ASTAT publichea chisc dis la zifres dl ann turistich 2008/09. Te chësta nrescida ie unì analisà la vela de albierch cun cëses y cumpëida di lies, ma nce la dumanda turistica n cont de persones unides adalerch y nuetes afitedes. Argumënt dl’analisa ie nce la relazion danter chisc valores.
-
Sezion autonoma per arbitradëures dl juech al palé
USP – L’autonomia dla sezion dl Südtirol di arbitradëures de juech al palé unirà inò recunesciuda. Chësc ie unì segurà dal’assoziazion AIA al presidënt Luis Durnwalder do che l regulamënt nuef udova me plu dant na sezion regiunela. De chësta dezijion se ova l Presidënt dla Provinzia parà ajache la jiva contra l’autonomia dl sport.
-
Jonta provinziela dl 29 de merz
USP – I obietives dl’Aministrazion provinziela de sparanië ie unic arjonc. La Jonta provinziela à ncuei (29 merz) dat pro che de crì manieres nueves per pudëi mo sparanië ti medemi ciamps. Do la senteda dla Jonta à l presidënt prejentà la dezijions de majera mpurtanza, danter chëstes nce co jì inant cun la reforma dla scoles autes dl Südtriol y canai de televijion nueves che sarà da udëi tres la RAS. Danter chisc nce la Televijon Rumacia tla cualità HD.
-
Valorisazion dl zënter de S.Crestina: dumandes ala populazion
USP – La populazion de S. Crestina ie nvieda a respuender a n cuestioner sun l zënter dl luech che vën mandà tla families mo dan Pasca. L’Assessorat provinziel al cumerz à cris ora S. Crestina sciche prim chemun pilot per nvië via n proiet de valorisazion dl zënter aldò de lege provinziela. Fin de dut l proiet ie chël de lauré ora pruvedimënc y scumenciadives per miuré l’atratività dl zënter dl luech.
-
Diploms per culaburadësses pedagogics dla scolines ladines
USP – Trëi ani se à culaburadësses pedagogics dla Val Badia y de Gherdëina dat ju cun na furmazion per se adaté a si cheder prufesciunel nuef. N mierculdi 31 de merz puderà 35 culaburadësses pië do dala 5 domesdì, tla scolina Salieta a Urtijëi, i diploms dal assessëur ladin Florian Mussner.
-
Cuatieres per la categuria mesana: lëtra ai chemuns
USP – 45 chemuns à damandà de unì tëuc n cunsciderazion per l program di 1000 cuatieres per families cun n davani mesan. Danter chisc iel nce i chemuns ladins de Urtijëi, Mareo y Ciastel. L assessëur Christian Tommasini à scrit na lëtra ai chemuns se damandan che i feje al savëi nchin ai 24 de mei la despunibltà dl grunc da frabiché.
-
Streda sun Börz sareda per trëi enes
USP – Sun la pert dla Val de Funes vën da n lunesc, 29 de merz sareda la streda de Börz. A Coll, a S. Piere de Funes vëniel fat lëures a na maniera che l ie debujën de saré la streda per feter trëi enes.
-
Studi sun l sport te scola: mpurtant, ma de plu ëures
USP – “N savëi sane te n corp sane”: do chësc moto ti dà la scola gran mpurtanza al nseniamënt de sport. Per nrescì ulache l ie pusciblteies de miuramënc y de mudamënc ie unì fat n studi cun na majera nrescida. Aldò de sculeies, genitores, nsenianc, diretëures y funziuneres tla lies, ie l nseniamënt de sport dassënn mpurtant, me che l vën tenì massa puecia ëures. I resultac ie unic prejentei ncuei (25 merz) dai assessëures provinziei ala scola deberieda cun i tecnics dl ciamp.