Atualità

USP – A Urtijëi iel ncuei (19 mei) unì premià i sculeies che à venciù l cuncors leterer per la scoles ladines. Chësc cuncors ie unì giaurì ai sculeies de duta la cin valedes ladines dla Dolomites. L ntendënt Roland Verra y l assessëur Florian Mussner à laudà la gran ceratività y la cura dla rujeneda da pert di sculeies.

USP – l presidënt dla provinzia Luis Durnwalder deberieda cun l assessëur Florian Mussner à ncuei fat na vijita tl camp de Sant’Elia, na frazion de L’Aquila tucheda dal tremot. L ie stat ucajion per rengrazië i uemes dla Prutezion zevila dl Südtirol che se cruzia da enes de chësc camp. Cun Guido Bertolaso, che ie a cë dla Prutezion Zevila dl Stat, à Durnwalder rujenà de aiuc per fé su da nuef la cëses.

USP – L memorandum de majera mpurtanza sun l tunel de basa dl Prëner y n cont di adatamënc dla linia dla ferata, ie unì firmà ncuei (18 mei) a Roma da pert dla Talia, Austra y Germania. Sun 80 ponc iel da pert di trëi guvierns unì fat ora l plan de finanziamënt y l calënder per la realisazion dl proiet. “Chësc ie unì sotscrì trajan ite i raions che dal scumenciamënt incà ie stai protagonisc’ dl proiet” à dit l Presidënt dla Provinzia Luis Durnwalder a Roma.

USP – N dumënia che vën, 24 de mei mostra la RAI de Bulsan la segonda pert dla documentazion sun la storia dl Südtirol. Dala 9.40 danmesdì uniral mustrà l capitul dedicà ala dlieja. L film documenter ie fat per talian cun ntervistes per tudësch y ladin.

USP – Chi che studieia tla Talia y oradecà, y respetea i criteries udui dant, possa damandé dala Provinzia de Bulsan cuntribuc per l ann academich 2009/2010. L Guviern provinziel à da permò dat pro l bando de cuncors aldò. Chi che damanda l prim iede na borsa de studi dëssa bele sën se lascé nuté su.

USP – I culaburadëures dla Prutezion zevila dl Südtirol se cruzia dla segurëza tl camp de Sant’Elia per la persones tuchedes dal tremot tl Abruzzo. La grupa per cuntac radio, cëla do chi che possa ite tl camp, fej raides de patruliamënt, dà ora la chertes digiteles per chi che vif tl camp y cëla do canche l vën menà adalerch marcanzia o fat servijes.

USP – La populazion dl Südtirol à ala fin dl ann 2008 arjont la cumpëida de 498.857 persones. Ntan chësc ann fejen cont che l unirà arjont la mesa miliarda. Passa mesa la populazion vif ora de zità. La cumpëida dla nascites ie caleda, ntan che la cumpëida di defonc ie aumenteda. A chësta maniera depënd la cumpëida dl populazion dantaprima dala defrënzia de chëi che ie jic a sté demez y de chëi che ie ruvei caprò. Tla valedes ladines iel unì cumpedà 19.646 persones y 6.668 families. La families ladines cumpëida n media 2,8 persones permez ala media provinziela de 2,5.

USP – Da Bulsan nchin sun l Renon te manco de 12 menuc. Chësc sarà mesun cun la furnadoia nueva che ie unida festejeda ncuei (14 mei) y che unirà giaurida al publich l’ena che vën. La furnadoia nueva cumporta na revoluzion n cont dl trasport publich tl raion dla zità de Bulsan cun n mplant, danter i plu modernes dl mond.

USP – Studënc de duta la valedes ladines se à dat ju cun leteratura y à prejentà lëures de bon livel. La premiazion dl cuncors de leteratura per la scoles ladines “Nos tl dialogh intercultural”, unirà tenida n merdi che vën, 19 de mei, dala 10 danmesdì tla scola auta Raetia a Urtijëi. L cuncors per sculeies ie unì metù a jì dala Ntendënza per la scoles ladines deberieda cun l Istitut Pedagogich Ladin, la Union Generela di Ladins dla Dolomites y i trëi Istituc Ladins de San Martin de Tor, Vich y Col de S. Lizia.

USP- A Corvara muessa la streda statela unì sareda da mierculdi 13 de mei nchin ala fin de juni ajache l vën fat n sotpassaje.