Atualità
Cësa dl Parch Puez-Odles y scola: furmazion y ambient
USP – A na maniera nueva vëniel a S.Magdalena de Funes metù adum furmazion y ambient. Tlo vëniel frabicà deberieda na cësa per l Parch naturel Puez-Odles y na scolina cun scola elementera. I assessëures provinziei Florian Mussner y Michl Laimer à ncuei (17 juni) vijità i lëures.
Canche se à cuncretisà l’idea de fé na cësa dl parch naturel te Funes an nce tëut la dezijion de nia plu cumedé su la vedla scola de S.Magdalena ma de nen fé su na nueva. „Sun na tela se à pità ucajion de proieté deberieda y nuzé sinergies sibe tla proietazion, che tl frabiché y pona dopro tl mené la cëses“ spiega l assessëur Mussner. Dl 2005 fovel unì scrit ora n cuncors a livel de Europa per la proietazion dla doi strutures. Ntlëuta iel unì mandà ite 122 proiec y l ie pona unì cris ora la pruposta di architec Stefan Burger y Birgit Rudacs de Minca.
Nchin de dezëmber dëssel sun na lerch de 5400 metri cuadrac unì fat su la cësa dl parch naturel cun doi partimënc (www.provinz.bz.it/natur/2803/parke/pues/naturphaus.htm) y la scola a trëi partimënc per 41 sculeies dl’elementera y 17 dla scolina, cun bibliotech, aula magna, mensa y local da fé ginastica.
Te chësta ucajion uniral nce fat n puent nuef per passé a pe sëura l ruf de Funes y arjonjer la doi frabiches. L custimënt dla doi cëses ie de feter 7,9 milion de Euro. Na terza pert finanzieia la Provinzia de Bulsan, y doi terzi l chemun de Funes.
as
Galaria dales fotografies
Cësa dl Parch Puez-Odles y scola: furmazion y ambient
