Atualità
Dala Jonta provinziela dl 5 de utober
USP – La data per i mplanc de segurëza ti hotiei ie unida spënta de n ann. Doi universiteies nciariedes à analisà la dumandes dl referendum n cont dla cumpatibltà cun la costituzion. Per la senteda dla trëi jontes provinzieles de Trënt, Bulsan y dl Lond Tirol ai 15 de utober, iel unì dat pro l orden dl di. Chisc ie stai i argumënc de majer nteres prejentei ncuei (5 utober) dal presidënt dla provinzia Luis Durnwalder do la senteda la Jonta.
Segurëza di hotiei
Sciche a livel naziunel, ie la data per mëter a post i mplanc de segurëza contra l meldefuech ti hotiei nce tla Provinzia de Bulsan unida spënta de n ann. Nchin ai 31 de dezëmber 2010 muessel unì fat i lëures per chisc mplanc de segurëza.
Cumpatibltà costituzionela n cont dl referendum
La universiteies de Dispruch y de Trënt ie unides nciariedes de analisé la cater dumandes dl referendum (dl 25 de utober). Sota la direzion dl pruf. Walter Obexer iel a Dispruch unì cialà sce la dumandes dl referendum va a una cun la diretives Europes. A Trënt à la grupa ntëur l pruf. Roberto Toniatti cialà do la cumpatibltà cun la costituzion taliana. Aldò de Durnwalder à tramedoi prufessëures dit che i referendum che fulestieres ne ruve nia tan saurì permez al frabiché cuatieres y na regulamentazion nueva per i segondi cuatieres, ne vede nia adum cun la regules naziuneles y a livel de Europa. N cont dla democrazia direta ne iel nia unì dat respostes definitives. Per via dla normatives europees messëssa la dumanda vester a post. A livel talian ie la dumanda contra la costituzion, ajache la na ntroduzion dla democrazia direta ie cuestion dl Cunsëi provinziel. Per via dl aeroport a Bulsan ne ie ënghe nia unì dat na posizion tlera. Per l pruf. Toniatti ne ie la dumanda nia tlera assé.
L presidënt Durnwalder à dit che l nvierà i doi prufessëures a prejenté nstësc si analises ala stampa. I referendum nstësc unirà a uni maniera tenii ai 25 de utober.
Euregio: orden dl di
Ai 15 de utober se anconta a Dispruch la trëi jontes per rujené de na lingia de cuestion che reverda la provinzies de Trënt, Bulsan y dl Lond Tirol. Ora de duta la prupostes de argumënc da traté iel unì fat na selezion y metù ju n orden dl di de 15 ponc. Chësc orden dl di ie ncuei unì dat pro dala Jonta provinziela de Bulsan. L unirà tratà cuestions che val dal’energia, ambient, trasporc ma nce furmazion y cultura, sanità, svilup, economia o culaburazions. “Me mbince che l sarà mesun delibré nce truepa dezijions” à dit Durnwalder.
Bilanz 2010: 9% demanco te truep capituli
Dl bilanz per l ann che vën iel unì debatù tla jonta provinziela. N messerà ciafië cun 300 milion de manco y nscila de ndut cun n bilanz de 5.100 milion de Euro. Te majera pert di capituli iel da fé cont cun n smëndrimënt de 9%. Ezezion fajerà tlo dantaprima la sanità y l soziel ulache n spenderà unfat, sce nia velch de plu, per valivé ora l’nflazion.
Pruposta de lege: valivanza di dërc
La Jonta provinziela à tëut tres la pruposta de lege n cont dla valivanza de dërc y l’à data pro cun vel mudazions.
Caserma Sadobre
Tl luech de Freienfeld daujin da Sterzing uniral vendù pertes dla caserma per l daz (tudësch Zoll) ala sozietà dl’Autostreda. L ie mo da udëi plu avisa ciuna pertes che unirà adurvedes per raions de produzion y cie che unirà vendù al’Autostreda.
as
