Atualità
Referendum: finà de cumpedé dala 12.00 – i resultac
USP – Ncuei danmesdì iel dala 12.00 unì finà de cumpedé ora la zedules di referendum de (inier) dumënia 25 de utober. La cumpëides de uni una dla 488 sezions de vela ie unides fates al savëi tres l sistem cun l BlackBarry.
I cin referendum ne ie nia unic litei dala cumpëida minima, l quorum, de 40% dla populazion y ne vel perchël nia. La prupostes de lege metudes dant ai zitadins ne ie a chësta maniera nia unides azetedes. L regules provinzieles che reverda i argumënc di referendum ne vën nsci nia mudedes.
Sciche udù dant per lege iel ncuei lunesc unì scumencià dala 7 da duman a cumpedé ora la zedules de vela. Diesc menuc do ie bele unì comunicà i prim resultac tla zentrela a Bulsan.
L prim referendum, zedula blancia, iel stat 82,6 % che à dit de scì n cont che fulestieres dëssa aspité plu ani per giapé cuntribuc per frabiché cuatieres y i cuatieres soziei. Tla segonda pruposta de lege, zedula de vela culëur lila, à l scì arjont l 80,9%. Tlo se ala tratà di segondi cuatieres per patrons che ne à nia la residënza te n luech. Cun la zedula de culëur ghiel, tl terzo referendum iel unì arjont l 71,7% de scì. La jënt à dit la sia n cont de referendum pra i gran proiec publics. Tl cuarto referendum, zedula bruma iel stat 83,2 % di litadëures che à dit de scì. La se tratova tlo dla democrazia direta nstëssa. Tl cuinto referendum, zedula culëur marila (albicocca), iel stat 81,0% che à dita de scì ala damandà sce la Provinzia dëssa zapé ora dl aeroport de Bulsan.
Davia che l ne ie nia stat assé litadëures, ne ie chësta prupostes de lege nia unides azetedes.
I resultac di singuli referendum te duta la provinzia, ti raions y ti singuli chemuns ie publichei sun la plates provinzieles tl internet sota l’adres www.wahlen.provinz.bz.it. La zifres ie te n prim mumënt mo nia ufizieles nchin che la cumiscion de vela na à nia dat si bënsté.
as
