Atualità
Descuscion te Jonta provinziela sun reformes dla lege dl frabiché cuatieres
USP – I assessëures provinziei ulëssa fé na lingia de mudazions ala lege sun l frabiché cuatieres. Te si senteda da (NCUEI) ai 12 de dezëmber iel unì tenì na descuscion sun la pruposta de mudazion per giapé plu debota i grunc da frabiché, per regules nueves a sëurandé cuatieres soziei y l mëter adum di cuntribuc provinziei per l fit y l cuatier.
La prima problematica che n uel ressolver cun la lege nueva reverda l mancë de grunc per pudëi frabiché cuatieres soziei o cuatieres per la categuria de davani mesan. “On bele udù dant na pruzedura plu debota per mëter a desposizion chisc grunc, tlo iel udù dant che i chemuns y la cumiscion urbanistica sibe a una, dan mëter a desposizion i grunc plu debota” à dit Durnwalder te cunferënza stampa, “aldò dla lege nueva dëssa basté sce l vën scutà su tramedoi pertes”.
Cuntenut dla lege nueva dëssa nce vester de majeri cuntribuc per families cun cumëmbri cun handicap. Na mudazion dëssel nce unì fat al regulamënt per sëurandé cuatieres soziei, tenian nia me cont di zitadins de chël chemun ulache ie l cuatier, ma nce dl bujën ti chemuns ujins.
Na nuvità uelen nce mëter a jì n cont di cuntribuc per l cuatier. Tl daunì dëssel unì paià ora nchin al plu de 4800 euro al ann y nia plu nchina 6.000 euro. I cuntribuc per l fit y per l cuatier dëssa unì aministrei na na sëula zentrela ti ufizies per cuestions sozieles. Chësc ie udù dant cun scumenciamënt te jené 2013.
Argumënt de reforma ie nce la graduatories di cuatieres soziei per zitadins dla Comunità europea y chëi che vën da oradecà. Tlo dëssel unì spartì su i mesuns finanziei a desposizion. “A chësta maniera ne à nia uni un l dërt de giapé” à dit Durnwalder. Plu che auter se tratela tanc che fej dumanda nchin ala data metuda dant, per pudëi pona fé la spartizion. “A chësta maniera ons plu segurëza tla programazion y schivon de messëi de ora for de plu” à dit l presidënt dla Provinzia.
as
