Atualità
Junta provinziala sön le pachet de sparagn: "Nou a tais unilaterai"
USP - Che la Provinzia mësses tó pert al ressanamënt dl bilanz statal é tler por la Junta provinziala. "Mo ci che i ne azetarun nia, é tais y intervënc a nosta autonomia fac dal Stat zënza se damanè”, insciö le Presidënt dla Provinzia Luis Durnwalder (INCÖ) ai 15 de dezëmber do na sentada straordinara dla Junta provinziala sön le pachet de sparagn dl stat.
Pordërt ess le test definitif dl pachet de sparagn statal messü ester bele incö danman, pordërt s’aspetânse inće dać concreć sön le sparagn, mo chësta suposiziun é gnüda indere sciurada te n piz a Roma. "Incö n’unse nia podü baié porsura desposiziuns y dać definitifs, mo ma porsura ći che é gnü publiché ćina śëgn, ajache an é ćiamò tl laûr da laurè fora le pachet de sparagn ", insciö Durnwalder. Implü él rové pormez n val d’ater: le bilanz provinzial y la lege finanziara tla Junta provinziala. Sce chëstes n’ess nia da gnì aprovades ćiamò incö, él prigo che i alisirimënć a chi che la Provinzia mira tomes t’ega. "Cun de gran groaries por che davagna demanco, les families y les impreses", insciö l’assessur por les finanzes Roberto Bizzo.
Durnwalder à portè dant le combinaziun pachet de sparagn, stat y lege finanziara dla Provinzia tres l’ejëmpl dl suplemënt sön la cuta sön le davagn IRPEF. "Chësta dess gnì alzada por düć a 1,23 prozënt cun le pachet de sparagn” insciö le Presidënt dla Provinzia. Tl medemo tëmp ne n’ess i alisiramënć dla provinzia nia faziun, sce la lege finanziara ne gniss nia aprovada. Ma les porsones cun n davagn ćina 12.500 euro rsp. 25.000 euro (cun mituns a ćiaria) foss lëdi dal suplemënt, deperpo che la Junta provinziala â preodü na esenziun ćina 15.000 euro y na reduziun dles cutes de 252 euro a möt por n davagn ćina 70.000 euro. "Sce i aprovun ćiamò incö la lege finanziara, va chisc alisiramënć en forza, inće sce ai nes costa deplü porvia dl alzamënt dles cutes statales, y plü avisa sis miliuns de euro deplü", insciö Durnwalder. L’alisiramënt - IRPEF di zitadins foss spo de 30 miliuns de euro.
Por l’IRAP ćiàrera fora feter anfat. Chësta dess gnì alzada dal stat a 3,4 prozënt por dötes les firmes, ater co por les assiguraziuns y les banches, che messess paié feter 7 % de IRAP. "I ti jun adincuntra a chisc alzamënć cun sostëgns, che ti gniss dà a firmes d’ejëmpl", insciö le Presidënt dla Provinzia. Mo chësc inće ma sce le bilanz y la lege finanziara vëgn aprovà incö.
Danü él che le stat à ćiarè ćina śëgn che les provinzies ne dais nia fora demassa. "Mo śëgn te n iade ô le stat scioldi da nos", insciö Durnwalder. Tröc scioldi: les provinzies dess dè jö 850 miliuns de euro, plü 60 miliuns de euro dess rové tles casses dl stat dales entrades di comuns. "Te nosc caje se tràtera de incër 120 miliuns de euro", insciö le Presidënt dla Provinzia. Chësc ascortamënt n’ôn y ne pon nia azetè ma insciö, dantadöt ajache al ne tëgn nia cunt di contribuć atuai dla Provinzia por le ressanamënt dl bilanz, y é gnü fat zënza intenüda o tratativa. "I ghirun indere che al vëgnes contratè cun nos y che al vëgnes laurè fora na desposiziun d’atuaziun”, insciö Durnwalder. Te de nöies verjiuns dl pachet de sparagn él inće chësta tlausola, mo: "Le stat se tëgn i scioldi ćina che al n’é nia gnü stlüt jö la tratativa", insciö le Presidënt dla Provinzia. "Inće cuntra chësc se parunse."
La chestiun dla cuta sön i imobii comunala IMU nöia é dër complicada. "I ùn calcolè che les entrades da chësta cuta jiss por la pröma ćiasa dai önesc miliuns da śëgn a 41 miliuns de euro, pro les secundes ćiases da 64 a 161 miliuns de euro", insciö l’assessur por les finanzes Bizzo. Mo che che pënsa che chisc 200 miliuns de euro röies tles casses di comuns se fala. "Le stat ghira na gran pert dles cutes IMU, implü déssel rové 60 miliuns de euro tles casses dl Stat, che vëgn dai comuns de chës provinzies che manajëia instësc i comuns", insciö Bizzo. Ai comuns ti romagnéssel na entrada majera de zirca 37 miliuns de euro. "Mo do che la IMU à metü sotissura döt le sistem finanziar di comuns, messésson ponsè tres le finanziamënt di comuns, sciacarè cun i comuns y aprovè na lege nöia", insciö Durnwalder incö.
An à inće vaghè na sciazada sön le bilanz dla Provinzia do la situaziun da incö dl pachet de sparagn statal. "Sce i ne ascortàsson nia les spëises por la cura, les politiches soziales, la sanité y le personal, messésson sparagné te düć i atri capitui le 5%", insciö le Presidënt dla Provinzia. "I messésson a vigni moda definì ćiamò n iade nüsc punć zentrai y ascortè daldô", insciö Durnwalder. Śëgn messunse naôta aspetè do le pachet de sparagn, y spo s’incunta la Junta provinziala de jenà te na tlausöra. "Spo unse na vijiun tlera y savun olache i messun fà adatamënć y ćiuns adatamënć che i messun fà y de tan che i messun ascortè", insciö le Presidënt dla provinzia.
usp
