Atualità
Aiuc per damandé cuntribuc per la cultura ladina
USP - Nchin ala fin de jené possa la lies damandé n cuntribut provinziel per judé a finanzië ativiteies tl ciamp dla cultura ladina ntan l 2012. N mierculdi ai 25 de jené vëniel tla Val Badia - y n lunesc ai 30 de jené te Gherdëina - pità n servisc de nfurmazion y aiut per fé la dumandes, ulache n posse nce les de ju.
L Ufize provinziel per la Cultura ladina pieta nce chëst ann n aiut speziel per damandé cuntribuc culturei te chëla che i culauradëures unirà nstësc ti luesc ladins per pië do la dumandes. Nchin ai 31 de jené 2012 possen mandé ite dumandes de sustëni finanziel per ativiteies ordinaries. Ntan la udienzes tla valedes uniral nce tëut ju dumandes che reverda nvestimënc, publicazions y proiec de artisć .
L servisc vën tla Val Badia pità n mierculdi, 25 de jené danmesdì (dala 10 ala 12) tl Chemun de Badia y domesdì (dala 16 ala 18) tla Cësa de Chemun a Al Plan. Respunsabli dla lies cultureles ladines de Gherdëina possa se nuzé dl servisc n lunesc domesdì, ai 30 de jené (dala 16.00 ala 18.00) tla Cësa de Chemun de Sëlva. “Chësc servisc ti luesc ie i ani passei dantaldut unì priejà da chëi che fej l prim iede na tel dumanda. Tlo vëniel nce stlarì ciun documënc che l va debujën y co che va la pruzedures” sorissea l assessëur ladin Florian Mussner.
La dumandes per cuntribuc provinziei possa nce unides mandedes ite tres posta, al Ufize cultura y scola ladina dla Provinzia de Bulsan, streda Binder 29, 39100 Bulsan.
I formuleres per fé dumanda giaten tl web sun la plata www.provinzia.bz.it/ntendenza-ladina/service/formuleres-cultura.asp o tl Ufize cultura y scola ladina a Bulsan, numer de telefonn 0471-417020/21.
La dumandes de cuntribuc per nvestimënc, publicazions y proiec artistics tl ciamp dla cultura ladina, possa alincontra unì dates ju ntan dut l ann.
as
