Atualità
Soluzion per l material dl tunel dl Prëner
USP – Majera pert dl material che vën giavà ora a fé l tunel dl Prëner vën nuzà. Per chëla pert che ne possa nia unì nuzeda à la Jonta provinziela (NCUEI) ai 16 de lugio dat pro na soluzion. Te chësta senteda iel nce unì dat pro i reprejentanc dla cumiscion scientifica.
A giavé ora l tunel dla ferata plu lonch d’Europa, iel tler che vën ora truep material. Per majera pert de chësc material iel mesun respeté la diretiva de l nuzé. Na mëndra pert dl material ne possa nia unì nuzeda y unirà metuda ju iló daujin.
La Jonta provinziela à fat ora de nuzé l raion dl vedl magasin dal polver dl militer, sëura Vahrn. Co che l presidënt Durnwalder à spiegà te cunferënza stampa, dëssel n iede unì scrit ora n cuncors per sëurandé la giara che possa unì giaveda ora. La puscion de 2,2 hectar ova la Provinzia sëurantëut dal Stat y śën possela se tré ite velch. La buja che resterà dopro dëssa pona unì curida cun l material dl tunel dl Prëner. “A chësta maniera vëniel nuzà chësc raion doi iedesc” à dit l Durnwalder. Na bona ie nce che l vedl magasin dal polver ie bel sun streda y nia da lonc dal cantier dl tunel.
La Jonta provinziela à tla medema senteda nce numinà i reprejentanc dla Provinzia per la cumiscion tecnich-scientifica dl tunel dl Prëner. L se trata de Flavio Ruffini, l diretëur nuef dl’agenzia per l ambient, y de Sieghart Flader, diretëur dl Ispetorat dl lëur dla Provinzia. Leprò uniral nce numinà n reprejentant dl ufize per l’igiena. La cumiscion à la ncëria de cumpanië l frabiché dl tunel y de se cruzië de na soluzion te cuestions de ambient y segurëza.
as
