Atualità
Sëira de film y descuscion sun l Permafrost, ai 13 a S.Crestina
USP – N juebia ai 13 de setëmber vëniel te cësa de Chemun a Santa Crestina mustrà n film y tenì na descuscion per ti jì do ala dumanda sce l permafrost fej sauté la pizes. La sëira a ntreda debant se stiza sun analises che ie nce unides fates sun Mëisules.
Te n film de 45 menuc possen udëi co che geologs ie jic pra i dlacieres y te raions critics dl'Elpes y te raions dai schi dl Südtirol. L sofonz melsegur manacia nia me l daunì ecologich di raions turistics, ma nce na cultura che la jënt dl'Elpes cura bele da seculi. L film dal titul "Permafrost: sprengt er die Gipfel?" fova l ann passà unì mustrà l prim iede pra l cunvëni d'autonn di geologs dl Südtirol a Bulsan. De juni fovel unì mustrà tla cësa dl parch naturel Puez-Odles y de lugio iel unì mustrà dala Rai de Bulsan.
Do l film, uniral a S.Crestina tenì na descuscion cun l reghisser Dennis Timm, l geologh dla Provinzia Volkmar Mair y si culaburadëures David Tonidandel yKathrin Lang. L publich ie nvià a rujené pea.
La sëira sun permafrost, n juebia ai 13 de setëmber, scumëncia dala 20.30 tla sala Raiffeisen tla cësa de chemun a S.Crestina.
---
Video "Prim resultac di studi dl permafrost sun Mëisules" sun www.youtube.com/ProvinziaBulsan
as
