Atualità
Dala Junta: finanziamënt ai Comuns por la banda lëria y l'ultima milia
I Comuns rurai podará ti rové pormez a n finanziamënt por stlü jö l’infrastrotöra dla banda lëria: la junta provinziala á daurí incö la prozedöra de presentaziun dles domandes d’aiüt preodüdes dala sotmosöra 7.3 dl Program de svilup rural nü. Le budget é de 15,3 miliuns de euro cina al 2020.
La sotmosöra 7.3 metüda ite tl Program de svilup rural dla Provinzia nü por le tëmp 2014-2020 prevëiga le sostëgn ai Comuns por i laurs d’istalaziun, mioramënt y espanjiun de infrastrotöres a banda lëria y de infrastrotöres passives por la banda lëria, sciöche ince aiüc por la fornidöra d’azes ala banda lëria y ai sorvisc online dla Aministarziun publica.
Düc i Comuns classificá sciöche sort D (raiun rural cun problems complessifs de svilup), en pratica düc i Comuns ater co Balsan nia, pó fá domanda de finanziamënt. Chësta mosöra conzed da daidé i Comuns da completé la rëi secondara dla fira otica, la ultima milia. Deperp che al ti speta ala Provinzia le compit da realisé les linies prinzipales y les incrujades de barat, ti speta la competënza sön l’ultima milia, le coliamënt devers i frabicac y l’utënt final, ai Comuns.
Le budget preodü por la mosöra dl Program de svilup rural é de 15,3 miliuns de euro por döt le tëmp de programaziun cina dl 2020. I proiec pó gní finanziá cina al 100%. I Comuns pó presenté les domandes de finanziamënt por le 2016 pian ia da merz, i termins romagn daverc trëi mëisc alalugia. Vigni Comun pó presenté na sora domanda de finanziamënt por le tëmp 2014-2020, che se referësc a un o de plü proiec esecutifs.
Le sostëgn al Comun ne pó nia superé la soma de n miliun de euro.
osp
