Atualità
Dala Junta: vademecum por apliché la lege provinziala söi apalc nöia
La Junta provinziala á aprové incö (ai 23 de forá) n vademecun por alisiré l’aplicaziun dles desposiziuns normatives dla lege provinziala söi apalc nöia. Le vademecum é n documënt cun plü diretives y al é gnü publiché sön la plata web dl’agenzia di contrac publics.
Te süa sentada á le Consëi di Ministri aprové la lege provinziala söi aplac nöia aprovada tl mëis de dezëmber dal Consëi provinzial. Degun articul ne é gnü contesté dal Govern. Al se trata de öna dles leges plü importantes de chësta legislatöra provinziala che rezepësc les diretives europeiches nöies dl 2014 y tol ite na seria de scemplificaziuns d’organisaziun y de burocrazia por garantí plü flessibilité tles prozedöres de surandada y plü sigurté iuridica. Implü él preodü alisiraziuns por i apalc publics de pices impreses y chëres mesanes. Cun la lege provinziala nöia á la Provinzia ince renforzé sües competënzes tres na lege delega dl Stat.
Por alisiré l’aplicaziun dla lege nöia á la Junta provinziala ince aprové n vademecum, n “liber bröm” – cun diretives che presentëia le test tl detai. “Pro vigni articul él gnü metü dlungia ince les perts che reverda les diretives europeiches, i codesc statai di aplac y na spligaziun de ci che les desposiziuns provinziales prevëiga, por stlarí te na manira tlera ince i seturs che reverda les competënzes regolamentades dala normativa provinziala en confrunt a chëra statala y ci fá ti caji che trames röia suralater”, á splighé le presidënt Arno Kompatscher. Le vademecum, elaboré dal’Agenzia provinziala di contrac publics en acordanza cun le Departimënt Laurs publics, adöm cun le Consorz di Comuns y le Comun de Balsan, gnará publiché sön la plata web dl’Agenzia.
rc
