Atualità

Frabiché | 20.04.2016 | 15:17

Üties da munt, surandada la bandira dla Provinzia

La bandira dla Provinzia sará da odëi pro dötes les 25 üties da munt passades dal Stat ala Provinzia. Incö danmisdé él gnü tigní la surandada.

Indöt é 25 üties da munt passades dal Stat ala Provinzia, y la gestiun de indöt 21 üties é gnüda assegnada da püch ai 21 davagnadus dles bandides desvalies. Incö (ai 20 d’aurí) á le presidënt Arno Kompatscher y l’assessur Florian Mussner surandé ai gesturs dles 25 üties da munt ofizialmënter la bandira dla Provinzia de Balsan. „Les üties da munt é na pert fondamentala dla merscia turistica dl Südtirol y un di sëgns plü importanc de nosc teritore. I gesturs dles üties da munt tëgn sö un de nüsc tesurs dl teritore südtirolej y insciö é le compit di manajadus dles üties da munt de gran importanza ince por so gran amur por les munts“, á dit le presidënt dla Provinzia Arno Kompatscher.

Ala fin dla prozedöra scomenciada d’otober dl ann passé á la comisciun tut la dezijiun da assegné 20 dles 21 üties ai gesturs atuai: danter les 20 üties da munt él ince da ciafé la ütia de Ncisles (Santa Crestina), la ütia de Dantersasc (St. Crestina) y la ütia „Rifugio Genova“ a Funes. Ma por trëi üties él sté de plü che á fat domanda. La prozedöra de elaboraziun dles bandides é gnüda fata adöm cun le CAI y l’AVS, che ará sëgn ince le compit da lauré fora na lista de priorités di intervënc dla manutenziun ordinara y straordinara. „La Provinzia fará süa pert cun n investimënt de 4,8 miliuns de euro, de chisc é 2,6 miliuns bele gnüs metüs tl bilanz 2016“, á prezisé Kompatscher.

L’assessur Florian Mussner á sotligné te so intervënt che „le percurs che á porté al’assegnaziun dles üties da munt é sté compliché, mo i ún sëgn na buna basa por podëi lauré inant ince ti proscims agn“. Le diretur de Departimënt Paolo Montagner, en rapresentanza dl assessur Christian Tommasini, á ajunté che „por l’aministraziun provinziala ne é chësc punt nia la fin de n proiet, mo le scomenciamënt de na colaboraziun ince por le dagní“. Le presidënt Kompatscher á dit che cun chësta conclujiun „él sté meso da ciafé la dërta strada por mëte en armonia sides i interesc dla Provinzia, che chi dles assoziaziuns alpines y dantadöt di gesturs dles üties che á la garanzia da podëi planifiché ince por le dagní.“

Dessot les intervistes y les imajes (audio y video), ince por ladin.

Imajes zelebraziun

Intervista assessur Mussner por ladin

Intervista Kompatscher

Intervista Christa Fontana (Ütia da munt Petrarca)

Intervista Elisabeth Illmer (Ütia da munt Forcella Vallaga)

Intervistes audio Kompatscher, Mussner, Fontana, Illmer