Atualità
Istituziun de na portina unica por les comunicaziuns tl frabiché
Portina unica por la gestiun dles pratiches che reverda les costruziuns tres n’acordanza danter Provinzia, Consorz di Comuns, Ciamena dl Comerz y aziëndes.
Na portina digitala unica sará na scemplifcaziun dles prozedöres, spliga l’assessuria por l’informatica Waltraud Deeg che á metü da jí le proiet en colaboraziun cun le Consorz di Comuns y la Ciamena dl Comerz. Al gnará a se le dé de plü sauridanzes: podëi fá domanda por na conzesciun da frabiché, comuniché arac geologics, fá comunicaziuns de operes de zement d’aciá y de strotöres metaliches y mené inant dötes les comunicaziuns che reverda l’ativité dl frabiché. Por le momënt él de plü ofizi comunai y provinziai che se crüzia de chëstes pratiches.
Dötes les perts interessades, dales imprese de costruziun, ai direturs di laurs, ai architëc, ai Comuns y al Ofize provinzial Azetaziun comunicazun de operes de zement d’aciá y de strotöres metaliches ará azes ala portina che sará ince na plataforma interativa por le barat d’informaziuns y de documënc. La responsabilité por la completëza dla pratica restará indere pro l’aziënda de costruziun, spliga l’assessuria Deeg che sotlignëia che tl dagní sarál plü saurí da verifiché le status dla prozedöra. Por la realisaziun dl proiet él preodü na dorada de zirca n ann y mez por definí ince düc i aspec tecnics y de formalité.
usp
