Atualità
Trienala ladina ciamó daverta cina ai 11 de jügn
An pó vijité la mostra coletiva d’ert ladina ciamó cina ai 11 de jügn tl Museum Ladin Ciastel de Tor.
![](/news/img/lazy.gif)
Chi che á interés da vjité les operes di sis artisć y dles artistes selezionades por la Trienala Ladina ará ciamó l’ocajiun da le fá cina en domënia ai 11 de jügn tl Museum Ladin a San Martin. La mostra coletiva de ert contemporanea vëgn organisada vigni trëi agn.
La 5. Trienala Ladina vëiga l’ert sciöche lerch d’identificaziun culturala che é gnüda dada inant, sciöche le lingaz ladin é gnü dé inant a usc por generaziuns intieres tles cin valades – Gherdëna y Val Badia tl Südtirol, Fascia tla provinzia de Trënt, sciöche ince Fodom y Ampëz tla provinzia de Belun, insciö ince tl Friul y ti Grijuns tla Svizera – y crësc cun prosperité tl vers dl dagní. Les artistes y i artisć che mostra sües operes é Hubert Kostner, Gabriele Grones, Nessi (Vanessa Layher), Notta Caflisch, Simon Perathoner y Andreas Senoner.
Le Museum Ladin Ciastel de Tor é ciamó davert al publich da en mertesc cina en sabeda dales 10 ales 17 y la domënia dales 14 ales 18. Le lönesc él dé de palsa. Por plü informaziuns: www.museumladin.it - 0474 524020.
USP