Atualità
-
Dala Junta: Re-ejaminaziun dles conzesciuns, i esperć é gnüs nominà
La Junta provinziala à nominé incö (3 de merz) i esperć aldinfora dl’aministraziun publica che à l’inćiaria da ejaminé danü les conzesciuns idroeletriches. Dl grup de esperć fejel pert le professur de iurisprudënza Fabrizio Figorilli, l’idrobilogh Giovanni Rossi y Ernst Pürer, ex –suranstant dla Voralberger Illwerke AG.
-
Dala Junta: Heiner Schweigkofler sarà le proscim presidënt dl IPES
La Junta provinziala à fat fora incö (3 de merz) l’inom dl presidënt dl IPES nü: al sarà Heiner Schweigkofler, diretur dla Caritas ti ultims 13 agn che surantolarà l’inćiaria de Konrad Pfitscher. „Al é na porsona cun capazitês da manager y cun tröpa esperiënza tles politiches soziales“, insciö le presidënt Kompatscher y l’assessur Tommasini.
-
Ressurses dla Provinzia por i proieć dl FSE: Aprovaziun di critêrs
La Junta provinziala à tut incö (03/03) la dezijiun da sostignì les ativitês y i proieć finanzià dal Fonds sozial europeich cun n interès publich tler realisades aladô dles desposiziuns iuridiches y cun degügn aspeć critics. Do l’ejaminiaziun roada da Bruxelles s’âl cherié plü problems por l’amissibilité dl finanziamënt di proieć dal FSE.
-
Dé di museums dl Südtirol: Le 2015 é dediché ai jogn
Söporjö 100 esperć y colaboradus di musems dl Südtirol s’à incuntè incö, lönesc ai 2 de merz tl Museion da Balsan por la nona incuntada anuala tl contest dl Dé di Museums dl Südtirol. Le tema prinzipal dl’incuntada é stè „Young & Museum“, la vijiun che fajarà da cornisc por döt l’ann tematich.
-
Vire le Südtirol al Expo 2015: Presentaziun de stand y conzet
Al pröm de mà metarà man l’Expo 2015 a Milan. Le Südtirol se presentarà te chësta ocajiun cun n stand a pert. „Le moto universal dla manifestaziun è ’Nudrì la tera, energia por la vita’ che se coliëia inće dër bun cun le Südtirol. Cun nosta presënza orunse ti pité ai vijitadus n’odlada reala ala manira de vire südtiroleja“, insciö le presidënt Kompatscher incö ala presentaziun dl stand südtirolej.
-
Scores de musiga: Iscriziuns por l’ann de scora 2015/16 ćina ai 31/03
Ćina la fin de merz pon se scrì ite por l’ann 2015/16 dles scores de musiga y por les edemes da d’isté 2015. Les iscriziuns por les scores de musiga dla Val Badia y de Gherdëna mëss gnì dades jö tles döes direziuns cun sënta a La Ila y a Urtijëi.
-
I parcs naturai chîr junior ranger
Inće chësc ann arà i mituns y les mitans danter i 10 y i 11 agn la poscibilité da tò pert a dui cursc (un por talian y l’ater por todësch) de „Junior ranger di parcs natuari“, na scomenciadia che „à l’obietif da informè i mituns sön plü temesc che reverda la natöra y sön le dërt comportamënt da tignì sön les munts y ti bosć“, insciö l’assessur por l’ambiënt Richard Theiner.
-
Regiuns ecosostenibles: Südtirol y Trentin é al pröm post
Le Südtirol y le Trentin confermëia sües posiziuns ai pröms posć sciöche les regiuns plü „vërdes“ dla Talia: chësc é le resultat dles valutaziuns sön la green economy dl 2014 publicades da püch. „La planificaziun detaiada dl Südtirol cun le plann tlima 2050 porta bele śëgn sü früć“, sotlignëia l’assessur por l’ambiënt y l’energia Richard Theiner.
-
Plurilinguism, intlujiun y lidëza: Vijita dles scolines dla Val Badia
Odëi sciöche al vëgn laurè söl post, analisé le svilup dl insegnamënt tles scolines y constatè la complessité dl laûr dles maestres aldedaincö:chisc é stà i punć prinzipai dla vijita da inier (26/02) dl assessur Florian Mussner, dl intendënt Roland Verra, dl’ispeturia Edith Ploner, dla direturia Hannelore Insam y dla responsabla por l’intlujiun Carla Comploi a n valgönes scolines dla Val Badia.
-
Dé dles ëres, ai 6 de merz saràl la conferënza stampa
La reuniun coletiva di Consëis dles ëres dl Südtirol y dl Tirol y les scomenciadies dla Comisciun por l’avalianza dles oportunitês: chisc sarà i temesc zentrai che gnarà presentà dal’assessuria Martha Stocker le proscim vëndres (ai 6 de merz) en ocajiun dl dé internazional dles ëres che vëgn festejé ai 08 de merz.