Atualità
Spedel de Persenon: cësa prinzipela fata da nuef
USP – Ntan i ultimi mënsc ie pra l spedel de Persenon unì frabicà da nuef 42.810 metricubich. Nscì iel unì finà via na gran pert dl renuvamënt dla cësa prinzipela. L presidënt dla Provinzia Luis Durnwalder, l assessëur ala sanità Richard Theiner y l diretëur dl raion saniter de Persenon Siegfried Gatscher à inier (15 de jené) danterëures giaurì la strutura nueva.
A Persenon jivla de miuré i servijes ti abulatueres y de adaté la majons y l’ntreda prinzipela a na maniera che les ti vënie ancontra ai paziënc. Nscì ova la Jonta Provinziela dl 2002 dat pro l proiet, l’Unità sanitera deberieda cun i dipatimënc provinziei per la sanità y per i lëures publics l à pona ti mënsc passei pudù realisé.
Tla pert nueva dl spedel iel unì njenià i locai per i servijes de dialisa, apotech, radiologia, l ambulatuere de ginecologia, la zentrela de prim aiut, na ustaria y nce la pediatiria, chirurgia (vasculera y plastica), la medejina 1, la cura de col-nes-ulrëdles. L custimënt ie stat de feter 17,3 milion de Euro. N ucajion dla giaurida dla cësa prinzipela iel nce unì giaurì la strutura per la reabilitazion y l servisc psicologich (cësa A1).
La frabica nueva pra l spedel de Persenon ie na nvestizion mpurtanta per l bënsté di zitadins y l spedel nstëss ie na luegia de speranza per duc chëi che adrova aiut, nscì Durnwalder ntan la giaurida. L ie mpurtant che i locai, la njinies y la tecniches tenie pea l standard di tëmps. De gran valor ie nce che i dutores y i culaburadëures per la cures ebe na bona furmazion. Nscì à l presidënt dla provizia rengrazià duc i culaburadëures dl spedel per si lëur de mpurtanza. L assessëur Theiner à sorissà che te d’autra regions dla Talia ne ruven tl ciamp saniter nia inant, ma tlo da nëus iel stat mesun purté inant y nce realisé cunzec aldò de nosc tëmps.
La cësa prinzipela dl spedel ie unida realiseda do i proiec dla grupa de architec Putzer, Pardeller y Scherer, che à proietà n restruturazion dla cësa a forma de „T“, la fajan sën a forma de crëusc. L majer mpëni ntan l frabiché ie stat chël de garantiì l’atività dl spedel ntan i lëures.
Sun cater patimënc iel unì njnià de ndut 44 majions nueves cun doi liec y n bani. Leprò vën mo 14 liec de dialisa. N à ulù dé n miëur ambient ala majons nueves dajan pëis al lën, l linëus y l culëur. Miuramënc iel nce unì fat per pudëi se muever tla strutura. Mpede un n lift y na scela orainsom la cësa, iel unì fat trëi lifc y doi sceles zëntreles che ie per i pazienc nce plu saurè da se urienté.
I lëures per miuré mo d’autra pertes dl spedel de Persenon dëssa bele scumencë chëst ann d’instà.
usp
Galaria dales fotografies
Foto USP/Pertl
