Atualità
Delegazion dala Cina y Durnwalder n cont de turism y economia
USP – La zità de Zhangjakou cun cin milions de abitanc tl nord dla Cina à nteres per l savëi n cont dl turism da inviern tl Südtirol. Argumënc dl’ancunteda danter la delegazion dala Cina y l Presidënt Durnwalder, nsëira (9 merz) ie nce stata l’agricoltura, l sistem de furmazion y l autonomia dla Provinzia de Bulsan.
Zhangjakou ie bele cunesciuda tl Südtirol. Te chësta region iel de nuvëmber unì giaurì n raion da jì cun i schi fat su cun l aiut de firmes da tlo. Na delegazion de Zhangjakou cun reprejentanc dla politica y economia ie chisc dis tl Südtirol per ti unì do al nvit de Durnwalder de se fé nstësc n cheder de nosc turism da inviern. L ti vën cialà ai raions da jì cun i schi y ala firmes tl ciamp dla tecnologia alpina. La delegazion furnerà te Gherdëina, sun l Plan de Corones y sun l Rosskopf.
Nsëira iel stat n’ancunteda politica cun l Presidënt dla Jonta tla cësa provinziela Widmann a Bulsan; tlo fovel nce l vizegouverneur dla region Zhangjakou, l ambolt dla zità y i respunsabli de si dipartimënt per l turism.
“On rujenà dla puscibltà de na culaburazion economica, tres chëla che l nord dla Cina ie nteressà a svilupé inant si turism da inviern y à perchël nteres al savëi che on tl Südtirol” nsci Durnwalder do l’ancunteda.
N model ie bele deventà l raion da jì cun i schi che ie unì fat tla Cina deberieda cun la firmes dl Südtirol, ma nce te d’autri ciamps se à Südtirol bele fat n inuem a Zhangjakou. “Sëuraprò al turism da inviern y la tecnologia alpina se ala nce tratà de agricultura dla versura, dantaprima de cultivazion, laurazion y mantenimënt, nsci sciche la produzion de vin” spiega l Presidënt dla Provinzia. I reprejentanc dala Cina à nce abù nteres al sistem de furmazion tla Provinzia de Bulsan, che Durnwalder à pudù prejenté deberieda cun l model dl’autonomia.
as
