Atualità
Berger damanda al CAI n cunzet per la uties da mont
USP – Tl ann 2010 toma la cunzescions dla Lia da Mont taliana CAI per la uties da mont dla Provinzia. “Nchin a ntlëuta nes muessa vester tler co che dëssa cialé ora l daunì dla uties” dij l assessëur al turism Hans Berger. Te n’ancunteda cun i respunsabli dl CAI se à Berger damandà che CAI y AVS tudësch, porte riesc n cunzet laurà ora deberieda.
“Ne ulon nia che dan che toma la cunzescion messons tò na dezijion de prëscia” sorissea Berger, che se à damandà dal presidënt dl CAI tla Provinzia de Bulsan, Giuseppe Broggi de se mëter a una cun l AVS per n cunzet deberieda per la uties da mont. “Lauran deberieda possel nce unì astilà ora deferënzies” à dit l assessëur. L cunzet de CAI y AVS dëssa unì purtà al Guviern provinziel che tulerà na dezijion sun l’adurvanza dla uties tl daunì.
L assessëur al turism se tëm che pra la uties da mont possel ruvé a na situazion de doi categuries. “Da una pert iel uties che ie tl nteres economich de privac y dal’autra pert de teles che ne ie nia de nteres economich ma che ie mpurtantes per l alpinism” analisea Berger. Nce per chësta rejon se damanda l assessëur n cunzet che tol ite duta la uties. Cun i reprejentanc dl CAI iel nce unì stlarì che l nteres dl alpinism muessa ruvé dan la pert economica.
Berger dà nce mpurtanza che tl CAI ruven internamënter a una sun co che n va inant. “Te chësc mumënt iel vijions defrëntes danter l CAI tl Südtirol y la zentrela a Milan” dij l assessëur. Tl’ancunteda iel nce unì rujenà che l mancia l nteres de fé nvestimënc pra la uties sce l daunì ne ie nia segurà. “On udù che l vën fat dumandes per lëures de manutenzion, a chëles che seguron nce scioldi, ma che i lëures ne vën pona nia fai” dij Berger. “Messon abiné na streda acioche l ne vën nia plu mpermetù scioldi che ne vën pona nia adurvei” spiega l assessëur.
as
