Atualità
Durnwalder anconta l presidënt Fischer a Viena
USP – Avisa l di che l Luis Drunwalder à dan 20 ani metù man si ncëria da presidënt dla Provinzia, al ncuei (17 merz) ancuntà l presidënt dl’Austria Heinz Fischer. I doi presidënc à dantaprima rujenà dl svilup atuel dl Südtirol y dl nvit a Fischer de unì n vijita per l ann de cumemorazion 2009. Fischer à sorissà che tl raport danter Austria y Südtirol ne se à mudà nia.
L di a Viena à per Durnwalder scumencià cun n’ancunteda de n’ëura cun l presidënt dl’Austria Heinz Fischer tla Hofburg. L ie dantaprima unì rujenà de argumënc dl’Europa y de co che la va tl Südtirol. “Plu che auter se tratovla ncuei de prejenté la situazion al presidënt dl’Austria n referimënt a si funzion de defendura” à dit Drunwalder. Tl Südtirol cëlen de ressolver internamënter i problems cun Roma. “Mëndra descuscions unirà for inò, ma per fertuna ne ons al mumënt nia de majera dificulteies che ne respetëssa nia l Tratat de Paris” dij Drunwalder che à ncuei nvià l presidënt dl’Austria a unì tl Südtirol per l ann de cumemorazion. “Nce da chësta pert dl Prëner iel per l ann de cumemorazion unì nvià via velch, che ulessan ti mustré al Presidënt dl’Austria” spiega Durnwalder.
Fischer à segurà che nce cun l guviern nuef ne se à mudà nia ti raporc dl’Austria cun l autra nazions y cun Südtirol. “Nosc mpëni ie restà l medemo y cialon de resté n pont de referimënt segur sun chël che nosc partner possa se lascé” à dit l presidënt dl’Austria. Do l presidënt Fischer, anconta Durnwalder ncuei da mesdì l Kanzler Werner Faymann y pona si vize Josef Pröll.
as
