Atualità
La streda dla Mendula gëura ai 3 de auril (audio)
USP – Do che la streda dla Mendula ie chësc inviern unì sareda plu iedesc per la truepa nëif, unirala per l 3 de auril inò giaurì per dut l di. Per la furnadoia sun scines iel bel anjeniei doi vagons nueves. Chësc ie unì fat al savëi ncuei (24 merz) a Bulsan te n ancunteda di assessëures provinziei Florian Mussner y Thomas Widmann cun i pendolares.
La situazion sun la Mendula ie particulera ajache da 57 ani ne iel nia stat tan de nëif sciche chësc inviern. La streda à messé unì śareda per pericul de levines y ajache la nëif à chësc inviern rot ju la prutezions. La levines che ie unides ju à nce trat pea sasc sun l parëi de crëp y nce per chësta rejon ne fova nia plu garantida la segurëza sun streda. “Ntan i proscimi dis uniral finà i lëures y fat cuntroi de segurëza a na maniera de pudëi ai 3 de auril giaurì la streda per dut l di” à ncuei segurà l assessëur Mussner. I pendolares dla Mendula se à stentà dassënn ntan chësc inviern: “davia che la segurëza ne fova nia garantida ons fat drët a śaré la streda” à detlarà l assessëur ala stredes. Mo n sëira iel unì muserà da 1,10 a 1,30 metri de nëif. “per la truepa nëif messons mo nchin de juni sté ert per la segurëza di lauranc che mënt a post la protezions” à dit Florian Mussner.
Nce per la furnadoia sun scines à la truepa nëif sun la Mendula purtà dificulteies. Da pert dl assessorat provinziel ala mubilità iesen tl lëur de mudernisé duta la strutura. “Per la furnadoia nstëssa ie bele anjeniei doi vagons panoramiches da 80 persones, y la stazion suinsom dëssa unì restrutureda” chësc à ncuei cunedì l assessëur Thomas Widmann. Per adaté la strutura ai vagons nueves iel debujën de saré la furnadoia per n mëns. Chësc sarà permò puscibl te chël mumënt che la streda sarà davierta per dut l di. L servisc de trasport per i pendolares y i turisć unirà ngrandì tl raion de Kaltern. “On bele adatà i orars dla curieres che muev dala stazion dla furnadoia , l proscimo var sarà chël de slargë ora l servisc nce da sëira” à dit l assessëur ala mubilità.
Do la situazion particulera de chësc inviern uniral nce studià tres mo n iede l proiet per miuré la streda dla Mendula. Tlo iel proietà n tunel nuef de 450 metri cun miuramënc di pitli puenc y dla prutezions per n custimënt de feter 15 milion de Euro.
as
