Atualità
83 milion de Euro tres la Segurazion de cura
USP – Da 17 mënsc ie la Segurazion de cura ududa dant per lege tla Provinzia de Bulsan. L ie n’arjonta storica, ma nce n gran mpëni y n gran custimënt. Nchin a sën iel unì fat 15.000 partizions de persones che à bujën de cura. De ndut iel unì paià ora 83 milion de Euro. L assessëur provinziel Richard Theiner à fat n bilanz.
„Cun la Segurazion de cura ons nvià via na segurazion de basa che vën finanzieda dal Fond soziel provinziel zënza ciarië l singul” nsci Theiner pra la prejentazion dl bilanz ai 26 de merz. L fin ie chël dé n aiut de basa a curì l custimënt dla cures che ie bujën. “Minà iel tlo cie che toca pra l maië, l lavé ju y muvimënt” dij l assessëur. L scioldi vën sambën paiei ora aldò de tan bujën che ie la cures.
L prim var ie stat chël de fé na partizion dla persones aldò dl bujën de cura. Me tl ann 2008 iel unì fat 13.300 de chësta partizions, 6.500 à mussù unì fates n cësa. Ti prim mënsc dl ann 2009 iel bele unì fat 1.800 partizions nueves. “La grupes dla partizions à fat n bon lëur, chësc vën nce a lum te chëla che l ie me unì fat recurs te 4,6% di caji” à dit Theiner.
Na cumiscion cëla do i recursc y da fauré vëniel nce fat cuntroi zënza fé al savëi danora, per udëi sce la persones giapa bën la cures.
I prim paiamënc per la cures ie unì paiei ora de juni dl ann passà, dal scumenciamënt de chëst ann iel nce unì paià ora per la cura de persones tla cëses de paussa y cura. Da ntlëuta iel unì paià ora 83,4 milion de Euro a 11.674 persones che adrova cures. 8.071 vif a cësa, 3.470 tla cëses de paussa y 133 ti spedei. Tl bilanz provinziel 2009 iel udù dant 184 milion de Euro per l fond de cura. “Chëstes ie somes de marueia, ma les ne basta nia per curì dut l custimënt per persones che adrova cures” dij l assessëur. “La Segurazion de cura ie stata na gran sfida per la politica te chisc ani.”
as
