Atualità
Finanziamënt abitatif per singuli y copies zënza mutons
USP – Persones singules y copies zënza mutons che à nchinamo giapà scioldi per l cuatier, l giaperà nce tl daunì. Chësc à la Jonta provinziela dat pro sun pruposta dl assessëur Christian Tommasini. Aldò dl assessëur al frabiché cuatieres, se tratel de n pruvedimënt per smëndrì la conseguenzes dla crisa economica.
L articul dla lege sun l frabiché cuatieres che dij che persones singules y la copies zënza mutons ne dëssa nia giapé l n finanziamënt per l cuatier, ne vën nia metù n drova. L se trata tlo di aiuc che vën dai ora tres l Istitut per l cuatieres soziei IPES.
“Son tl lëur de mëter a jì da nuef la normatives per l finanziamënt de cuatieres” spiega l assessëur Tommasini, “ma te n mumënt de crisa sciche chësc, devënta i scioldi per l cuatier n aiut essenziel per tré inant”. La va sëuraprò de mëter n drova i programs dl Istitut per cuatieres soziei per frabiché na bela cumpëida de cuatieres da fité.
Tl ann 2008 iel unì paià ora finanziamënc per l cuatier a 3544 persones singules y a 688 copies zënza mutons. De ndut iel unì dat ora 7,92 y 1,86 milion de Euro. Chëi che à giapà chisc aiuc economics ie persones cun n davani sota la segonda categuria dla suvenzions per l frabiché cuatieres.
as
