Atualità
Labirint de Furtëza mostra dai 9 de mei „lidëza“
USP – A Bulsan ie ncuei (15 auril) unì prejentà la mostra interregiunela dal titul Labirint:Lidëza che giaurirà ai 9 de mei tla furtificazion de Furtëza (Franzensfeste). L se trata de na mostra metuda a jì dai trëi assessorac ala cultura dla Provinzia de Bulsan n culaburazion cun l Land Tirol y la Provinzia de Trënt.
L furtin de Furtëza pieta la luegia adateda per na mostra che tres l’idea de labirint mostra su coche la persona chier la lidëza. Nchin ala fin de utober puderan udëi testemunianzes de persones, cosses y ert te na maniera drët nteressanta y che nvieia a pensé do nstësc.
Per la mostra Labirint::Lidëza iel unì adatà la pert zentrela dl furtin de Furtëza a na maniera che l publich possa per l prim iede vijité nce chësta pert dla costruzion asburgica. De ndut iel feter 14.000 metri cuadrac a desposizion dla mostra.
“La lidëza ne possen nia arjonjer defin, ma n possa ti ruvé daujin”, cun chësc moto pieta la mostra de Furtëza, te si luegia tan adateda, manieres de fé nstësc vares de vies dla lidëza. L ie na mostra lesiera y plëina de emozions, na mostra per l’aurela curta y da pensé do, ironica y da plajëi. Persones conta tres video, foto y registrazions si stories. L vën metù ora feter 200 cosses che testemunieia tëmps y situazions, deberieda cun ert moderna de inuem nternaziunel. Di 50 artisć che mët ora si opres iel nce Philipp Messner de Urtijëi.
“La culaburazion per chësta mostra va sëura la sëides dla provinzia ora y chësc ie na bela esprescion che la cultura lieia la jënt de plu raions” à dit l assessëur ladin Florian Mussner. Tla mostra ie reprejentedes duta la rujenedes, idioms y dialec dla Provinzia de Bulsan, Trënt y dl Tirol. “Chësc ne n bel sëni de de populi che se liëia” nscì Mussner.
“Nvieda ie duta la populazion, de unì età, de unì tla mostra y nce se se lascé ite tl argumënt dla libertà” à dit l assessëura Sabina Kasslatter Mur pra la prejentazion. La luegia dla mostra ie unida anjenieda per duta la familia cun nce lerch per n picknick ala lergia y lueges de gheneda. Nce l assessëur ala cultura taliana Christian Tommasini nvieia la populazion a crì chësc ideal dla lidëza che per ël n fin zentrel dl vester.
Ot sezions tematiches prejënta la la lidëza y la mancë de lidëza, chësta sezions ie dedichedes ala cumenanza, la rujeneda, mubilità, la prijunia, sëides, furmazion/scienza, crëidum y l’ert. La mostra ne à nia n parcurs ma ie liedia, spartida su te 86 locai.
Manifestazions cumpanieia la mostra de Furtëza ntan l instà nchin d’autonn. Sun n gran palch uniral danterauter tenì n gran cunzert jazz cun Carla Bley. Per l prim iede uniral de setëmber purtà dant n cunzert cun trëi mujighes y trëi cores cun n pez de Wolfgang Mitterer scrit per la mostra regiunela 2009. Sëuraprò ala vijites menedes vëniel pità dumënies per la families, mëises de descuscion y workhops creatives. Cun n program spezifich vëniel nce nvià sculeies, studënc y seniores. Duta la vela ie cumpanieda da n catalogh de 384 plates.
La mostra Labyrint:Lidëza de Furtëza ie nce prejenteda tla rujeneda ladina tl internet sun la plates “lab09.net”. Dal 9 de mei nchin ai 30 de utober possen uni di ji a ti cialé ala mostra zënza paië.
as
Galaria dales fotografies
