Atualità
Jonta provinziela dl 25 de mei
USP – La Jonta provinziela de Bulsan à tratà ncuei (25 mei)la vijita a L’Aquila, n fond de resserva per respunsabltà tl’ulentariat, l blason sun la pagels de scola y n finanziamënt per l istitut de edilizia soziela. Chisc ie stai i argumënc de majera mpurtanza che l presidënt Durnwalder à prejentà tla cunferënza stampa da mesdì.
Aiuc per i teremotei
N ucajion dla vijita de Durnwalder cumpanià dal assessëur Mussner a L’Aquila, iel unì rujenà cun i respunsabli sun l post de fé su inò la cëses. Nchinamo à la Provinzia de Bulsan dat pro de judé cun na milion de Euro. Nchin de juni dëssel unì smendrì la cumpëida di ulenteres dal Südtirol y me plu jì inant cun persones paiedes y jënt dl post.
Sun ndicazions dl cumandant dla Prutezion zevila dl Stat, Guido Bertolaso, giaperà la Provinzia na lerch ulache l dëssa unì fat su cëses cun cuatieres. Da pert dl’aministrazion provinziela uniral njenià la nfrastrutures primeres (ega, strom, gas) y njenià la fundamëntes de peton. Pona uniral scrit ora n cuncors per firmes che fej cëses prefrabichedes. La cëses de lën dëssa unì finanziedes dala Provinzia, dai chemuns y cun dunfiertes dla jënt. La dunfiertes possa unì fates tres l cont de banca dla Cassa dl Sparani (IT27 E060 4511 6190 0000 0008 346), la Banca Populera (IT60 I058 5611 6010 5057 0110 000) y la Raiffeisen (IT19 F034 9311 6000 0030 0043 001).
Garanzia per l ulentariat
Per schivé che l vënie a se l dé n segondo “cajo Mathà” à la Jonta provinziela dat pro de anjenië n fond de garanzia y l ntegré tla lege omnibus. “Te caji estremes, canche la assegurazions privates ne basta nia plu, y ulenteres muessa respuender n cajo de desgrazies, ulons pudëi ntervenì cun scioldi sparaniei te chësc fond” à dit Durnwalder.
Statut dl’Autostreda
Nchin al ann 2014 iel mo da udëi sce la cunzescion per l’autostreda vën slungëda ala sozietà da śën. La Jonta provinziela à dat pro la pruposta de mudazions al statut. “Chësc ie stat debujën ajache ulon mantenì cërta garanzies sciche per ejëmpl l atività de trasport de marcanzia cun la ferata, sciche l suzed bele tres la sozietà RTC o la produzion de hidrogen (Wasserstoff)” à spiegà l presidënt dla provinzia.
Aiuc per cuatieres
La Jonta provinziela à dat pro n finanziamënt de 110 milion de Euro per l Istitut per cuatieres soziei IPES. 48 milion de Euro uniral paià ora te forma de cuntribuc per paië l fit. “Chësc ie inò 6-7% de plu permez al ann passà, ma tl daunì ne saral nia plu mesun auzé uni ann chësc custimënt.
Paië viages per unì a lité
La provinzia ne puderà nia paië la spëises de viac a studënc che ie oradecà y che vën a cësa per la veles dl Parlamënt europeich.
I studënc possa jì a lité tl consulat dl luech ulache i studieia. Chiche studieia tla Talia, giapa la cherta dla ferata 60% plu bon marcià.
La Jonta provinziela à ncuei nce dat pro 38 milion de Euro per borses de studi y cuntribuc a chi che va a scola.
Pageles cun blason dl Stat
Giuridicamënter ne iel nia da dubité che da pert dla scoles provinzieles posse unì dat ora pageles cun me l’eguia provinziela. La delibra aldò ie permò unida fata de auril y śën iel é massa tert per mudé la vedla pageles. “Per l ann de scola che fina tosc uniral mo adurvà la vedla pageles cun nce l blason dl Stat” à detlarà Durnwalder. Na dezijion definitiva unirà permò tëuta per la pageles dl ann de scola che vën.
Dlieja russa a Maran
La Provinzia de Bulsan uel fé pert dla sozietà Borodine a Maran, patrona dl luech "Zarenbrunn" cun na dlieja ortodossa y na cësa per seniores. “On de bon raporc cun la Ruscia y canche proscimamënter vën a nes crì l minister rus per l trasport, ulons pudëi sotscrì l’acurdanza. Nsci puderà nce unì fat i lëures de mantenimënt a Maran” à dit Durnwalder.
Davis Cup a Maran
De setëmber uniral a Maran jugà l turnoi de tennis Davis Cup danter la Talia y la Svizra. Tlo jugherà nce l campion Roger Federer y i miëur jugadëures dla provinzia. “L Südtriol sarà ntan chisc dis inò zënter dl nteres sportif y perchël sustën la Provinzia chësc turnoi cun 120.000 Euro, che ie la medema soma che ie unida data per l Giro d’Italia” à dit Durnwalder. Na manifestazion sportiva de chësta mesura ie nce nteressanta ajache la cumpëida de turisć dala Svizra ie ultimamënter cresciuda dassënn.
Cunzescion a post
Sun la polemiches unides ora n cont de mëter ora da nuef la cunzescion per la ferata dla Val Venuesta ala SAD ie unì anjenià na documentazion avisa. Aldò de chisc documënc ie l decret dal pont de ududa giuridich a post. L prim decret che fova unì fat ne ie nia unì mandà ora y perchël ne velel nce no. Sun cunsëi dl ufize di aucac provinziei iel pona tl segondo decret unì slungià la cunzescion de 9 mpede 12 mënsc. L diretëur per l trasport de persones giapa na suspenjion de un n mëns a na maniera che l possa unì fat cuntroi.
as
