Atualità

Frabiché | 26.05.2009 | 15:27

Zircunvalazion de S. Crestina n armunia cun la cuntreda

USP – La firma Metall Ritten ie ncuei (26 mei) unida nciarieda dala Provinzia de Bulsan de realisé dlandri per i puenc dla nueva streda de zircunvalazion de S.Crestina. L unirà fat dlandri aldò dla idea de doi architec jëuni de Urtijëi che ova venciù l cuncors scrit ora dal Assessorat per la stredes. La giaurida ufiziela dla streda de zircunvalazion nueva unirà fat ai 16 de lugio.

La streda de zircunvalazion de S.Crestina vën fata per garantì plu segurëza sun streda y per ti pité na miëur cualità de vita ala populazion. “Messon nce tenì cont de nosc gran avëi che ie la cuntreda y perchël ons metù a jì n cuncors per abiné tres l’architetura n’armunia danter streda y cuntreda” spiega l assessëur Florian Mussner. David Stuflesser y Nadia Moroder, tramedoi de Urtijëi, ova venciù l cuncors per architec jëuni y si idea unirà śën realiseda.

La pert zentrela dla nota architetonica per la streda de zircunvalazion de 1.600 metri, ie i dlandri di puenc. L urientamënt dl’opra architetonica vën dala cuntreda. La carateristiches de chësc raion dëssa se spidlé ti dlandri di puenc y tl medemo mumënt dëssi nce ti dé ai puenc pesoc n cialé ora plu lesier. I doi architec jëuni à ulù abiné n balanz danter elemënc da cësa - chëi dla cuntreda, y elemënc nueves. I dlandri de culëur d’or spidla l linëus dl surëdl y fej a chësta maniera referimënt al culëur cueciun (la nrosadura) che la Dolomites giapa da sëira. Aldò dl linëus che muda ntan l di spidla i dlandri nce n autra tonalità de culëur.
Sun i doi gran puenc che mesura 57 y 73 metri de lunghëza, vëniel fat dlandri de acel inox laurà a de plu manieres.
Tl proiet de Stuflesser y Moroder iel nce udù dant la luminazion di dlandri. L linëus dëssa unì fat cun mesura y la streda nstëssa dëssa unì lumineda tres i dlandri.

La firma Metall Ritten à giapà l lëur de fé i dlandri per n custimënt de 424.662 Euro. Cin firmes, cater dl Südtirol y una de oradecà ova mandà ite na si pruposta. I lëures ie jic ala firma dl Renon per la bona cualità de lëur che ëi garantësc. I lëures unirà scumencei proscimamënter.

Ai 16 de lugio sarà l mumënt bele aspità da ani che auti y mesuns pesoc ne muessa nia plu passé tres l luech da S.Cristina. La pert ufiziela dla giaurida sarà la juebia domesdì (dala 17.00). Ntan l fin dl’ena uniral jit inant cun la Segra dl luech y la lies anjenierà da fé festa sun la vedla streda delibreda dal muvimënt pesoch.

as

Galaria dales fotografies