Atualità
Resultac dl ejam de Stat ala fin dla Scola Mesana ti luesc ladins
USP - L Intendent Ladin Roland Verra lascia al savei i resultac dl Ejam de Stat ala fin dla Scola Mesana te Gherdeina y tla Val Badia.
L ejam ie jit regularmenter y di 267 candidac ne ie mé un nia passà. Do la rata se tratovel de n ejam bendebò sfadieus, che udova danora nia mé la proves scrites de ladin, tudesch, talian , conc y l ejam a usc, ma nce mo la prova naziunela INVALSI de talian y conc seuraprò. Te chesc cajo ie da auzé ora i bon resultac dla prova naziunela de conc, manco auc ie tla mesaria chei de talian.
Tla Scola Mesana de Al Plan fovel ndut 28 candidac, duc passei, y de chisc n fovel 3 che à arjont la mesaria dla valutazions plu auta de diesc. Tla Scola Mesana de San Martin fovel 45 candidac, duc passei y de chisc 4 à giatà la mesaria dl 10. Tla Scola Mesana da La Ila fovel 57 candidac, duc passei y de chisc 6 à arjont la valutazion plu auta. Tla Scola Mesana de Selva fovel ndut 41 candidac, duci e passei y 3 à giatà la mesaria de diesc. Tla Scola Mesana de Urtijei ie di 96 candidac un nia passà y 12 sculeies à arjont la valutazion de diesc.
USP
