Frabiché | 16.07.2009 | 20:26

La zircunvalazion de S.Crestina ie davierta (cun audio)

USP – Per la populazion de S.Crestina y de duta Gherdëina à ncuei (16 lugio 2009) cun la giaurida dla streda de zircunvalazion scumencià n’era nueva. Sun 1.679 metri de streda possa l gran muvimënt astilé ora l zënter, la populazion à a chësta maniera na miëur cualità de vita. L presidënt la Provinzia Luis Durnwalder y l assessëur ai lëures publics Florian Mussner à nsnuet giaurì la streda deberieda cun i ambolc dla valeda y na gran cumpëida de jënt.

I auti che ne ruva per l gran plën nia inant su per l zënter de S.Crestina y mpesta mo deplù l’aria, ie me plu n bur' lecort. Cun la nueva streda de zircunvalazion à la Provinzia de Bulsan fat n nvestimënt sun cualità de vita a S.Crestina, giaurian nsci nce pruspetives nueves n cont de atratività. „Canche fove deventà assessëur é riesc scumencià a purté inant chësta idea dla zircunvalazion, ncuei do 7 ani, sons dassënn cuntënt che on pudù la giaurì“ à dit l assessëur Florian Mussner. La populazion prejënta te na gran cumpëida à respundù cun gran aplaus canche l presidënt la Provinzia Durnwalder à rengrazià l assessëur Mussner per avëi purtà inant chësc lëur. „Ulon garantì segurëza sun streda y cualità de vita ala populazion de duta la valeda, perchël ons nce fat chësc gran lëur“ à dit Luis Durnwalder pra la giaurida.

32.100.000 Euro iel unì spendù ite acioche auti y mesuns pesoc ne muessa nia pu furné per „la losa“ la streda Dursan a S.Crestina. Sun la streda nueva possen nce arjonjer i mplanc portamont da Ruacia y ruvé diretamënter tl zënter dl luech passan per Iman. I lëures sun l post ova metù man de auril 2007 y la streda à pudù unì giaurida do 27 mënsc de lëur.

Per la zircunvalazion iel unì fat doi tuniei y cin puenc. L tunel plu lonch ie tlamà „Monte Pana“ y mesura 475 metri. De merz 2008 ie unì batù tres do avëi giavà feter cin mënsc. L tunel Saslong ie cun 375 metri plu curt, ma per via dl stlet material da giavé ora an giavà mo n tan giut: diesc mënsc. Chësc tunel passa feter 20 metri sota l purtoi dai schi. Per nia resië l’atività dla furnadoia fovel permò unì scumencià a giavé ora do l inviern 2007/08 y l ie pona unì batù tres a mez utober 2008. Plu che i tuniei scundui sot a tiera, dà i puenc tl uedl. L majer puent dala raida dl Greva nchin sot a l luech da Artic mesura 73 metri y ie sun pont plu aut, 19 metri da fonz. L puent danter la raida Dorives y l tunel ie 35 metri lonch y 10 metri aut. Danter tuniei y la lerch per i puenc iel unì giavà ora 180.000 metri cubich de material. „Feter 50.000 metri cubich on pudù adurvé sun l post per spusté l ruf y anjenië la plazes dai auti ti raion iman“ spiega l ing. Georg Fischnaller.

Raion da jì a pe
Ntan la giaurida iel unì sotscrì i documënc che la vedla streda devënta puscion dl Chemun de S.Crestina. Ora de la streda Dursan uel l chemun man man fé madurì n raion da jì a pe. Nchin de ala fin de setëmber vën chësta streda śareda dala 5 domesdì ala 10 da sëira. Ntan l’autra ëures dl di possen me furné a 30 Km/h. I mesuns pesoc sëura 7,5 tones ne possa nia plu passe.

Trafich te Gherdëina
Pra la giaurida dla zircunvalazion nueva à l assessëur Florian Mussner nce cialà inant al problem dl muvimënt sun streda per duta la valeda. „Ne pudon nia rujené de śaré i jëufs o de fé na ferata sce dal’autra pert ons fat tan n gran lëur sciche chësta streda“ à dit Mussner, „l ie debujën che l vënie rujenà a na basa lergia de chisc problems“.

as

Galaria dales fotografies

Downloads